കൊച്ചി: ഷോഡശക്രിയകളോടെ ജര്മ്മന് സ്വദേശി ക്രിസ്റ്റ്യന് യജ്ഞോപവീതം ധരിച്ചു. കഴിഞ്ഞ നാലുദിവസങ്ങളിലായി തൃശൂര് തെക്കേമഠത്തിലായിരുന്നു കര്മ്മാനുഷ്ഠാനങ്ങള്. വൈദിക വിദ്യാപീഠത്തിന്റെ നേതൃത്വത്തിലായിരുന്നു ഉപനയനാദികള്. ചേലാമറ്റം പാടിവട്ടത്തു മനയിലെ മായയെ ജീവിത സഖിയാക്കുന്നതിനായിരുന്നു പൂണുനൂല് ധരിച്ചത്.
പെരുമ്പാവൂര് ചേലാമറ്റത്ത് പാടിവട്ടത്തുമനയിലെ പരേതനായ നീലകണ്ഠന് നമ്പൂതിരിയുടേയും സാവിത്രി അന്തര്ജനത്തിന്റേയും മകളാണ് മായ. ചേലാമറ്റം ശ്രീകൃഷ്ണ സ്വാമി ക്ഷേത്രത്തിലെ ഗോകുലം ഓഡിറ്റോറിയത്തില് തുലാം രാശിയിലെ മുഹൂര്ത്തത്തിലായിരുന്നു പാണീഗ്രഹണം. തുടര്ന്ന് അഗ്നിസാക്ഷിയായി ലാജഹോമാദികള് ചെയ്തു.
മായ യുസി കോളജില് ഡിഗ്രിക്കും കുസാറ്റില് നിന്നും ഫിസിക്സില് പിജിയും നേടി. അഹമ്മദാബാദ് പ്ലാസ്മ റിസര്ച്ച് ഇന്സ്റ്റിറ്റ്യൂട്ടില് ജോലി ചെയ്തുവരുന്നു. ഇതിനിടെ ജര്മ്മനിയില് ഫെല്ലോഷിപ്പ് നിര്വഹിച്ചു ഡോക്ടറേറ്റും നേടി. ക്രിസ്റ്റ്യനെ മായയ്ക്ക് പത്തുവര്ഷമായി അറിയാം. ഭാരതത്തിനെകുറിച്ച് അറിവുനേടിയിരുന്ന ഇദ്ദേഹം ഹിന്ദുമതാചാരത്തെ ഏറെ ബഹുമാനിച്ചിരുന്നു. യാഗങ്ങള് തുടങ്ങിയവയെ കുറിച്ച് പഠനം നടത്തിയിരുന്നു. ബ്രാഹ്മണന് അനുഷ്ഠിക്കേണ്ട ക്രിയകള് നിര്വഹിച്ചാണ് മായയുമായി വിവാഹം നടന്നത്. റെനാറ്റെ ഹോപ്ഫിന്റേയും പരേതനായ ഫ്രിക്സ് ഹോപ്ഫിന്റേയും മകനാണ് ക്രിസ്റ്റ്യന്.
