തിരുവനന്തപുരം : കേരള സര്വകലാശാല യൂണിയന് പ്രവര്ത്തന ഉദ്ഘാടന ചടങ്ങില് രജിസ്ട്രാര് എന്ന നിലയില് പങ്കെടുത്തത് വൈസ് ചാന്സലര് മോഹനന് കുന്നുമ്മല് സസ്പെന്ഡ് ചെയ്ത രജിസ്ട്രാര് ഡോ. കെ എസ് അനില്കുമാര്.ഈ സാഹചര്യത്തില് ഇടത് വിദ്യാര്ഥി യൂണിയന്റെ പരിപാടി വി സി മോഹനന് കുന്നുമ്മല് ബഹിഷ്കരിച്ചു.
തിരുവനന്തപുരം വഴുതക്കാട് വിമണ്സ് കോളജിലാണ് കേരള സര്വകലാശാല യൂണിയന് പ്രവര്ത്തന ഉദ്ഘാടന ചടങ്ങ് നടന്നത്.വി സി താല്ക്കാലിക രജിസ്ട്രാറായി നിയമിച്ച മിനി കാപ്പനെ പരിപാടിയില് നിന്നും പൂര്ണമായി ഒഴിവാക്കി. എഴുത്തുകാരന് ടി ഡി രാമകൃഷ്ണന് ചടങ്ങ് ഉദ്ഘാടനം ചെയ്തു. വിദ്യാഭ്യാസ മേഖലയില് ചിലരുടെ താല്പര്യങ്ങള് നടപ്പിലാക്കാന് പലരെയും നിയമിക്കുന്നു. അക്കാഡമിക് പ്രവര്ത്തനങ്ങളില് നിരന്തരമായ ഇടപെടലുകള് ഉണ്ടാകുന്നുവെന്നും ടിഡി രാമകൃഷ്ണന് പറഞ്ഞു.
കേരള സംഗീത നാടക അക്കാദമി വൈസ് ചെയര്പേഴ്സണ് പുഷ്പവതി പരിപാടിയില് മുഖ്യാതിഥിയായി. സര്ക്കാര് സംഘടിപ്പിച്ച സിനിമ കോണ്ക്ലേവിലെ അടൂരിന്റെ പരാമര്ശത്തിനെതിരെ വീണ്ടും പുഷ്പവതി രംഗത്തെത്തി.
സര്വകലാശാല സെനറ്റ് ഹാളില് സ്വകാര്യ ട്രസ്റ്റ് സംഘടിപ്പിച്ച ചടങ്ങില് ഭാരതാംബയുടെ ചിത്രം വച്ചതിനെ എസ് എഫ് ഐയും കെ എസ് യുവും എതിര്ത്തപ്പോള് അതിനൊപ്പം നിന്ന വ്യക്തിയാണ് ഡോ. കെ എസ് അനില്കുമാര്.ഗവര്ണര് രാജേന്ദ്ര ആര്ലേക്കര് പങ്കെടുക്കേണ്ട ചടങ്ങിന് രജിസ്ട്രാറെന്ന നിലയില് ഡോ കെ എസ് അനില്കുമാര് അനുമതി നിഷേധിക്കുകയും ചെയ്തതോടെ വി സി ഡോ മോഹന് കുന്നുമ്മല് അദ്ദേഹത്തെ സസ്പന്ഡ് ചെയ്തു.ഗവര്ണറോട് അനാദരവ് കാട്ടിയതിനാണ് നടപടി.താല്ക്കാലിക രജിസ്ട്രാറായി മിനി കാപ്പനെയും നിയമിച്ചു.
എന്നാല് സസ്പന്ഷന് അംഗീകരിക്കാന് ഡോ കെ എസ് അനില്കുമാറോ ഇടത് അംഗങ്ങള്ക്ക് ഭൂരിപക്ഷമുളള സിന്ഡിക്കേറ്റോ തയാറായില്ല. ആശംസ പ്രസംഗത്തിനായി നോട്ടീസില് കേസ് അനില്കുമാറിന്റെ പേര് തന്നെയായിരുന്നു ഉള്പ്പെടുത്തിയിരുന്നത്.
