മുംബൈ: ജൂലായ് മാസത്തെ ഇന്ത്യയുടെ ചില്ലറ പണപ്പെരുപ്പം വെറും 1.55 ശതമാനം മാത്രമെന്ന് കണക്കുകള്. ഉപഭോക്തൃ വില സൂചികയുടെ അടിസ്ഥാനത്തിലാണ് ചില്ലറ പണപ്പെരുപ്പം കണക്കാക്കുക. അതായത് ഉപഭോക്താക്കള് ഉപയോഗിക്കുന്ന അവശ്യസാധനങ്ങളായ പച്ചക്കറികള്, ധാന്യം, പയറുവര്ഗ്ഗങ്ങള്, മുട്ട തുടങ്ങിയ വസ്തുക്കളുടെ വില കുറഞ്ഞാലാണ് ഉപഭോക്തൃവില കുറയുക. 2017ന് ശേഷം ഇതാദ്യമായാണ് ഇത്രയും താഴ്ന്ന നിലയിലേക്ക് ഉപഭോക്തൃ വില സൂചിക താഴുന്നത്. ഇത് ഇന്ത്യയില് അവശ്യസാധനങ്ങളുടെ കാര്യത്തില് വിലക്കയറ്റം ഇല്ലെന്നതിന്റെ സൂചനയാണ് നല്കുന്നത്. അതായത് സാധാരണക്കാര്ക്കും ചെറിയ വരുമാനത്തില് ജീവിതം തള്ളിനീക്കാന് കഴിയുന്ന സാഹചര്യമുണ്ടെന്നാണ് ഇത് സൂചിപ്പിക്കുന്നത്.
ജൂണ് മാസത്തില് ചില്ലറ പണപ്പെരുപ്പം 2.10 ശതമാനമായിരുന്നു. ചില്ലറ പണപ്പെരുപ്പത്തിലുണ്ടായ ഈ താഴ്ച തീര്ച്ചയായും പണപ്പെരുപ്പം കുറയ്ക്കാന് സഹായിക്കും. ഭക്ഷ്യവിലയിലെ വിലക്കയറ്റം പിടിച്ചുനിര്ത്താന് സാധിച്ചതാണ് ഉപഭോക്തൃവില സൂചിക താഴാന് കാരണം.
ഭക്ഷ്യവിലയിലെ പണപ്പെരുപ്പം നെഗറ്റീവ് മേഖലയിലാണ്. ജൂണില് -1.01 ശതമാനമായിരുന്നെങ്കില് ജൂലായില് അത് -1.76 ശതമാനമായി താഴ്ന്നു. 2019 ജൂലായ്ക്ക് ശേഷം ഭക്ഷ്യവിലയിലെ പണപ്പെരുപ്പം ഇത്രയും കുറയുന്നത് ഇതാദ്യമാണ്. പച്ചക്കറി, പയറുവര്ഗ്ഗങ്ങള്, ധാന്യങ്ങള്, മുട്ട, പഞ്ചസാര, ഭക്ഷ്യവിതരണത്തിനുള്ള ഗതാഗതം എന്നിവയുടെ വില കുറഞ്ഞതാണ് ഭക്ഷ്യവിലയിലെ പണപ്പെരുപ്പം ഇത്രയും കുറയാന് കാരണമായത്.
