തിരുവനന്തപുരം: ശബരിമലയില് ആഗോള അയ്യപ്പസമ്മേളനം വിളിച്ചു ചേര്ക്കുമെന്ന് പ്രഖ്യാപിച്ച ദേവസ്വം മന്ത്രി വി.എന്. വാസവനോട് ഗൗരവമുള്ള ചോദ്യങ്ങളുമായി ബിജെപി ദേശീയ നിര്വാഹക സമിതി അംഗം കുമ്മനം രാജശേഖരന്.
ശബരിമലയിലെത്തിയ അയ്യപ്പന്മാരെ ക്രൂരമായി മര്ദ്ദിക്കുകയും കള്ളക്കേസുകള് രജിസ്റ്റര് ചെയ്ത് ബുദ്ധിമുട്ടിക്കുകയും, സ്ത്രീകളെ മന:പൂര്വ്വം ക്ഷേത്രത്തിലേക്ക് കൊണ്ടുവന്ന് ഭക്തരുടെ വികാരങ്ങളെ വ്രണപ്പെടുത്തുകയും ചെയ്ത സര്ക്കാരിന് അയ്യപ്പസമ്മേളനം നടത്താന് ധാര്മ്മികമായ അവകാശമുണ്ടോ? ശബരിമല ആചാര സംരക്ഷണത്തിനായി സമരം ചെയ്ത പതിനായിരക്കണക്കിന് നിരപരാധികളായ ഭക്തര്ക്കെതിരെയുള്ള കേസുകള് പിന്വലിക്കാത്ത സര്ക്കാര് നടത്തുന്ന സമ്മേളനം ഭക്തര്ക്ക് നേരെയുള്ള വെല്ലുവിളിയല്ലേ? കുമ്മനം ചോദിച്ചു.
അന്നദാനവും ചികിത്സയും മറ്റ് സേവനങ്ങളും നല്കാന് സംഘടനകളെ അനുവദിക്കുന്നില്ല. താമസത്തിന് അമിത നിരക്ക് ഈടാക്കുകയാണ്. ആവശ്യത്തിന് കക്കൂസുകളും കുളിമുറികളും ഇല്ല. പമ്പയില് സ്നാനം, തര്പ്പണം എന്നിവയ്ക്ക് നിയന്ത്രണം ഏര്പ്പെടുത്തിയിരിക്കുകയാണ്. ഇങ്ങനെ ഭക്തര് കഷ്ടപ്പെടുമ്പോള് സമ്മേളനം നടത്തുന്നതിന്റെ അര്ത്ഥം മന്ത്രി വ്യക്തമാക്കണം.
ശബരിമല ഭരിക്കുന്ന സ്വതന്ത്ര പരമാധികാര ദേവസ്വം ബോര്ഡിനെ അറിയിക്കാതെ സമ്മേളനം നടത്തുമെന്ന് പ്രഖ്യാപിച്ചത് ശരിയാണോ, ശബരിമല ശുചിത്വ സംരക്ഷണത്തിനായുള്ള ‘പുണ്യം പൂങ്കാവനം’ പദ്ധതി നിരോധിച്ച സര്ക്കാരിന് സമ്മേളനം നടത്താന് ധാര്മ്മിക അവകാശമുണ്ടോ, ശബരി റെയില് പാതയ്ക്ക് കഴിഞ്ഞ 25 വര്ഷമായി ഭൂമി ഏറ്റെടുക്കാതെ സമ്മേളനം നടത്തുന്നതില് ആത്മാര്ത്ഥതയുണ്ടോ, എക്കോ സ്മാര്ട്ട് പദ്ധതി, ജസ്റ്റിസ് ചന്ദ്രശേഖരമേനോന് കമ്മിഷന്, ഹരിവരാസനം പദ്ധതി എന്നിവയില് നല്കിയ ശിപാര്ശകളൊന്നും നടപ്പാക്കാതെ നടത്തുന്ന സമ്മേളനം കൊണ്ടെന്ത് പ്രയോജനം?
മതേതര സര്ക്കാര് മന്ത്രിസഭയിലെ ഒരു അംഗം ഒരു ഹിന്ദു ക്ഷേത്രത്തില് ഭക്തജനങ്ങളുടെ യോഗം വിളിച്ചു ചേര്ക്കുന്നത് ഭരണഘടനാ ലംഘനമല്ലേ. ശബരിമലയിലേതുപോലെ ക്രിസ്ത്യന്, മുസ്ലിം ആരാധനാലയങ്ങളില് വിശ്വാസികളുടെ ആഗോള സംഗമം നടത്തുമോ?
കേന്ദ്രം അനുവദിച്ച 100 കോടി രൂപ ശബരിമലയില് ഉപയോഗിച്ചിട്ടില്ല. 340 കോടി രൂപയുടെ പമ്പ ആക്ഷന് പദ്ധതി പരാജയപ്പെട്ടു. ഒരു വികസന പദ്ധതിയും സമയബന്ധിതമായി നടപ്പാക്കിയിട്ടില്ല. ശബരിമലയിലേക്കുള്ള കെഎസ്ആര്ടിസി ബസുകളില് അമിത യാത്രാ നിരക്ക്, വൈദ്യുതി ചാര്ജ്, ഭക്ഷണ വില, പാര്ക്കിങ് ഫീസ് തുടങ്ങി ഭക്തരില് നിന്ന് ഉയര്ന്ന തുക ഈടാക്കുന്നു. ധര്മ്മശാസ്താവിനെ ദര്ശിക്കാന് വരുന്നവരോട് അധാര്മ്മികമായി പണം ഈടാക്കുന്നത് അയ്യപ്പധര്മ്മത്തിന് അനുകൂലമാണോയെന്നും ഇത്തരം സാഹചര്യത്തില് നടക്കുന്ന സമ്മേളനം ഭക്തരെ വഞ്ചിക്കുന്നതിനല്ലേയെന്നും കുമ്മനം ചോദിച്ചു.
