ന്യൂദല്ഹി: ആപ്പിള് ഐ ഫോണ് നിര്മ്മാണത്തിലും സെമികണ്ടക്ടര് ചിപ് നിര്മ്മാണത്തിലും ഇന്ത്യയുടെ മുന്നേറ്റം തടയാന് ചൈനയുടെ ബോധപൂര്വ്വശ്രമം. പുതിയ സാങ്കേതികവിദ്യ ഇന്ത്യയ്ക്ക് കൈമാറാതിരിക്കാനും ആധുനിക നിര്മ്മാണയന്ത്രങ്ങള് ഇന്ത്യയ്ക്ക് നല്കാതിരിക്കാനും ചൈന ശക്തമായ കരുനീക്കങ്ങള് നടത്തുന്നു. അതിന് ഉദാഹരണമാണ് ഇന്ത്യയില് ഐ ഫോണ് നിര്മ്മിക്കുന്ന തായ് വാനിലെ ഫോക്സ് കോണ് കമ്പനിയില് നിന്നും 300 ചൈനീസ് എഞ്ചിനീയര്മാരെ പിന്വലിച്ചതും സെമികണ്ടക്ടര് ചിപ് നിര്മ്മിക്കുന്ന ലോകത്തിലെ നമ്പര് വണ് കമ്പനിയായ തായ് വാനിലെ ടിഎസ്എംസിയെ സെമികണ്ടക്ടര് ഫാബ് സ്ഥാപിക്കുന്നതില് നിന്നും ചൈന തടഞ്ഞത്.
ആപ്പിള് ഐ ഫോണ് നിര്മ്മിക്കുന്ന ഫോക്സ് കോണ് എന്ന തായ് വാന് കമ്പനിയില് നിന്നും 300 ചൈനക്കാരായ എഞ്ചിനീയര്മാരെ ഒറ്റയടിക്ക് പിന്വലിച്ചതിന് പിന്നില് ഇന്ത്യയ്ക്ക് സാങ്കേതിക വിദ്യ കിട്ടുന്നത് തടയാന് വേണ്ടിയാണെന്ന് വിലയിരുത്തല്. ഇന്ത്യ ആപ്പിള് ഐ ഫോണ് നിര്മ്മാണരംഗത്ത് സ്വന്തം നിലയില് മുന്നേറാതിരിക്കണമെങ്കില് ഇതിന്റെ സാങ്കേതികവിദ്യ തടയേണ്ടതുണ്ട് എന്നതിനാലാണ് ഒറ്റയടിക്ക് 300 എഞ്ചിനീയര്മാരെ ഇന്ത്യയില് നിന്നും ചൈനയിലേക്ക് തിരികെ വിളിച്ചത്. അതുപോലെ ഐ ഫോണ് നിര്മ്മാണവുമായി ബന്ധപ്പെട്ട ആധുനികമായ ഉപകരണങ്ങളും നല്കാതെ തടഞ്ഞുവെച്ചിരിക്കുകയാണ് ചൈന.
ഐ ഫോണ് നിര്മ്മാണത്തിലെ അസംബ്ലിലൈന് തടസ്സപ്പെട്ടാല് ഏറ്റവും പുതിയ ഐ ഫോണ് മോഡലായ ഐ ഫോണ് 17ന്റെ നിര്മ്മാണം തടയാന് സാധിക്കും. വിയറ്റ്നാമില് നിന്നും തായ് വാനില് നിന്നും എഞ്ചിനീയര്മാരെ കൊണ്ടുവന്നും, നിര്മ്മാണത്തിനുള്ള ചില യന്ത്രങ്ങള് ഇന്ത്യയിലെ തൊഴിലാളികള്ക്ക് ഉപയോഗിക്കാന് പാകത്തില് രൂപകല്പന ചെയ്തും നിര്മ്മാണം സുഗമമാക്കാന് ശ്രമിക്കുകയാണ് ആപ്പിള് ഐ ഫോണ്.
പുതിയ സാങ്കേതിക വിദ്യയും ഉല്പാദനപ്രക്രിയയുമായി ബന്ധപ്പെട്ട ഭൗമസംഘര്ഷങ്ങളുടെ ഭാഗമാണ് ഇന്ത്യയിലെ ഫോക്സ്കോണ് ഫാക്ടറിക്ക് സംഭവിച്ച പ്രതിസന്ധി. അതുപോലെ തായ് വാനില് നിന്നുള്ള ടിഎസ് എംസി എന്ന കമ്പനി ഇന്ത്യയ്ക്ക് സെമികണ്ടക്ടര് ഫാബ്രിക്കേഷന് പ്ലാന്റ് നിര്മ്മിക്കുന്നതിനുള്ള സാങ്കേതിക വിദ്യ കൈമാറുന്നതില് നിന്നും പിന്മാറിയതും ചൈനയുടെ സമ്മര്ദ്ദഫലമായാണ്. സെമികണ്ടക്ടര് രംഗത്തും ഇന്ത്യയ്ക്ക് ആവശ്യമായ സാങ്കേതിക വിദ്യ ലഭിക്കരുതെന്ന ചൈനയുടെ നിര്ബന്ധബുദ്ധിയാണ് ഇതിന് പിന്നില്. യുഎസ്, ജപ്പാന് , ജര്മ്മനി തുടങ്ങി സെമികണ്ടക്ടര് ഫാബുകള് ഏറെ വികസിച്ച രാജ്യങ്ങളിലേക്ക് പോകാനാണ് ടിഎസ് എംസി ശ്രമിക്കുന്നത്. ടിഎസ് എംസി പിന്മാറിയെങ്കിലും ഇന്ത്യ തായ് വാനിലെ പവര് ചിപ് സെമികണ്ടക്ടര് മാനുഫാക്ചറിംഗ് കോര്പറേഷന് (പിഎസ് എംസി) എന്ന കമ്പനിയെ ആശ്രയിക്കുകയാണിപ്പോള്.
ചിപ് ഉല്പാദന രംഗത്ത് മിടുക്കരായ സാങ്കേതികവിദഗ്ധര് ഇന്ത്യയ്ക്കില്ല എന്നത് വലിയ തടസ്സമാണ്. ഇതും ടിഎസ് എംസി സെമികണ്ടക്ടര് ലാബ് സ്ഥാപിക്കാന് മടിക്കുന്നതിന് ഒരു കാരണമാണെന്ന് പറയുന്നു.
