കൊല്ലം: ചവറ തെക്കുംഭാഗം സ്വദേശിനി അതുല്യ ഷാര്ജയില് ആത്മഹത്യ ചെയ്ത കേസില് തിരുവനന്തപുരം വിമാനത്താവളത്തില് വച്ച് പൊലീസ് കസ്റ്റഡിയിലെടുത്ത ഭര്ത്താവ് സതീഷ് ശങ്കറിനെ ക്രൈം ബ്രാഞ്ചിന് കൈമാറി. വലിയതുറ പൊലീസ് കസ്റ്റഡിയില് എടുത്ത പ്രതിയെ പത്തനംതിട്ട ക്രൈംബ്രാഞ്ച് യൂണിറ്റിനാണ് കൈമാറിയത്.
കൊല്ലം ജില്ലാ കോടതി ഇടക്കാല മുന്കൂര് ജാമ്യം അനുവദിച്ചതിന് പിന്നാലെ സതീഷ് നാട്ടിലെത്തുകയായിരുന്നു.സതീഷിനെതിരെ കൊലപാതക കുറ്റത്തിന് തെളിവുകള് ഇല്ലെന്ന് ഇടക്കാല മുന്കൂര്ജാമ്യ ഉത്തരവില് കോടതി പറഞ്ഞു.എന്തെങ്കിലും തെളിവുകള് ലഭിച്ചിരുന്നെങ്കില് ദുബായ് പൊലീസ് സതീഷിനെ അറസ്റ്റ് ചെയ്യുമായിരുന്നുവെന്നും അതുല്യയുടേത് തൂങ്ങിമരണം ആണെന്നാണ് കോണ്സുലേറ്റ് നല്കിയ പോസ്റ്റ്മോര്ട്ടം റിപ്പോര്ട്ട് എന്നും ചൂണ്ടിക്കാട്ടിയാണ് വ്യവസ്ഥകളോടെ കോടതി ജാമ്യം അനുവദിച്ചത്.
ഞായറാഴ്ച പുലര്ച്ചെ ഷാര്ജയില് നിന്ന് എത്തിയ സതീഷിനെ തിരുവനന്തപുരം വിമാനത്താവളത്തില് എമിഗ്രേഷന് വിഭാഗം തടഞ്ഞുവെച്ച് വലിയതുറ പൊലീസിന് കൈമാറുകയായിരുന്നു.
അതുല്യയുടെ മരണം കൊലപാതകം ആണെന്നാണ് മാതാപിതാക്കള് പരാതി നല്കിയത്.വിദേശത്താണ് അതുല്യ മരിച്ചത് എന്നതിനാല് അന്വേഷണം ക്രൈംബ്രാഞ്ച് ഏറ്റെടുത്തു.
അതേസമയം, മുന്കൂര് ജാമ്യം ഉള്ളതിനാല് അറസ്റ്റ് രേഖപ്പെടുത്തി, മറ്റ് നടപടിക്രമങ്ങള് പൂര്ത്തിയാക്കി സതീശിനെ വിട്ടയക്കും. സതീഷിനെതിരെ കൂടുതല് തെളിവുകള് ശേഖരിച്ച് നിയമനടപടികളിലേക്ക് കടക്കാനാണ് അന്വേഷണ സംഘത്തിന്റെ തീരുമാനം
