ന്യൂദല്ഹി: ആദിത്യ ശ്രീവാസ്തവ എന്ന ഒരൊറ്റ വോട്ടര്ക്ക് ഇന്ത്യയിലെ മൂന്ന് സംസ്ഥാനങ്ങളില് വോട്ടുണ്ടെന്നും തെരഞ്ഞെടുപ്പ് കമ്മീഷന്റെ കള്ളത്തരത്തിന് ഇത് ഉദാഹരണമാണെന്നും ഉള്ള കോണ്ഗ്രസ് നേതാവ് രാഹുല് ഗാന്ധിയുടെ നുണ പൊളിച്ച് ഇന്ത്യാ ടുഡേ. കര്ണ്ണാടക, മഹാരാഷ്ട്ര, ഉത്തര്പ്രദേശ് എന്നീ മൂന്ന് സംസ്ഥാനങ്ങളില് ആദിത്യ ശ്രീവാസ്തവയ്ക്ക് വോട്ടുണ്ടെന്നായിരുന്നു രാഹുല് ഗാന്ധിയുടെ ആരോപണം. പക്ഷെ ആദിത്യ ശ്രീവാസ്തവയ്ക്ക് കര്ണ്ണാടകയില് മാത്രമേ വോട്ടുള്ളൂവെന്നും മഹാരാഷ്ട്രയിലും ഉത്തര്പ്രദേശിലും വോട്ടില്ലെന്നും ഇന്ത്യാ ടുഡേ നേരിട്ട് നടത്തിയ അന്വേഷണത്തില് കണ്ടെത്തി. മാത്രമല്ല, ഇന്ത്യയില് ഒരാള്ക്ക് ഒന്നില് അധികം സംസ്ഥാനങ്ങളില് വോട്ടുണ്ടെങ്കില് അത് പരിശോധിച്ച് പരിഹരിച്ചിട്ടുണ്ടെന്ന തെരഞ്ഞെടുപ്പ് കമ്മീഷന്റെ വാദം ശരിയാണെന്നും ഇന്ത്യാ ടുഡേ കണ്ടെത്തിയിട്ടുണ്ട്.
ആദിത്യ ശ്രീവാസ്തവയ്ക്ക് മൂന്ന് സംസ്ഥാനങ്ങളില് വോട്ടുണ്ടായത് തെരഞ്ഞെടുപ്പ് കമ്മീഷന് നടത്തിയ വോട്ടുതട്ടിപ്പിന്റെ ഉദാഹരണമാണെന്ന് രാഹുല് ഗാന്ധി പറഞ്ഞു. ആദിത്യ ശ്രീവസ്തവയ്ക്ക് മൂന്ന് സംസ്ഥാനങ്ങളില് വോട്ടുണ്ടെന്ന് വോട്ടേഴ്സ് ഐഡി കാര്ഡ് ചൂണ്ടിക്കാട്ടിയാണ് രാഹുല് ഗാന്ധി ആരോപണം ഉയര്ത്തിയത്.
എന്നാല് ഇന്ത്യാ ടുഡേ ലേഖകന് ആദിത്യ ശ്രീവാസ്തവയെ കണ്ടെത്താന് യുപിയില് ലഖ്നോവിലെ ഇന്ദിരാനഗറിലുള്ള ആദിത്യ ശ്രീവാസ്തവയുടെ അഡ്രസ് തേടിച്ചെന്നു. പക്ഷെ ആദിത്യ ശ്രീവാസ്തവയുടെ അഡ്രസില് വീടുണ്ടെങ്കിലും ആരും അവിടെ താമസമില്ലെന്ന് കണ്ടെത്തി. ആദിത്യയുടെ അയല്ക്കാരനായ ലക്ഷിത് ശ്രീവാസ്തവ പറഞ്ഞത് വര്ഷങ്ങള്ക്ക് മുന്പേ ആദിത്യ ശ്രീവാസ്തവ വിദ്യാഭ്യാസത്തിനും തൊഴിലിനുമായി അവിടം വിട്ട് പോയി എന്നാണ്. ആദ്യം മഹാരാഷ്ട്രയില് പോയ ആദിത്യ ശ്രീവാസ്തവ പിന്നീട് കര്ണ്ണാടകയിലെ ബെംഗളൂരുവിലാണ് ഉള്ളതെന്നും അയല്ക്കാരന് പറഞ്ഞു. ഒരിയ്ക്കലും വോട്ട് ചെയ്യാന് ആദിത്യ ശ്രീവാസ്തവ ലഖ്നോവില് വരാറില്ലെന്നും അയല്ക്കാരന് പറഞ്ഞു. വല്ലപ്പോഴും എന്തെങ്കിലും ചടങ്ങുകള്ക്ക് മാത്രമേ ആദിത്യ ശ്രീവാസ്തവ വീട്ടില് എത്താറുള്ളൂ.
മഹാരാഷ്ട്രയിലെ മുംബൈയില് നിന്നും എംബിഎ എടുത്ത ശേഷം ആദിത്യ പിന്നീട് ബെംഗളൂരുവില് ജോലി ചെയ്യുകയാണ്. “ഒരിയ്ക്കലും ഉത്തര്പ്രദേശിലെ ലഖ്നോവില് ആദിത്യ വോട്ട് ചെയ്യാന് വരാറില്ല”.- അയല്ക്കാരന് ലക്ഷിത് ശ്രീവാസ്തവ പറയുന്നു.
ആദിത്യയ്ക്ക് മഹാരാഷ്ട്രയിലെ മുംബൈയിലും വോട്ടില്ല. ആകെ കര്ണ്ണാടകയിലെ മഹാദേവപുരയില് മാത്രമേ വോട്ടുള്ളൂവെന്നും ഇന്ത്യാ ടുഡേ കണ്ടെത്തി. ഉത്തര്പ്രദേശിലെയോ മഹാരാഷ്ട്രയിലെയോ വോട്ടര്പട്ടികയില് ആദിത്യയുടെ പേരില്ലെന്നും ഇന്ത്യാ ടുഡേ അന്വേഷണത്തില് കണ്ടെത്തി. ഇതോടെ ആദിത്യ ശ്രീവാസ്തവയ്ക്ക് മൂന്ന് സംസ്ഥാനങ്ങളില് വോട്ടുണ്ടെന്ന രാഹുല് ഗാന്ധിയുടെ വാദം നുണയാണെന്ന് ഇതോടെ തെളിഞ്ഞു.
ഒരാള്ക്ക് വിവിധ സംസ്ഥാനങ്ങളില് വോട്ട് എന്ന സ്ഥിതി ഇപ്പോഴില്ലെന്നും വോട്ട് ഡ്യൂപ്ലിക്കേറ്റിംഗ് പരിശോധനയിലൂടെ ഒഴിവാക്കിയിട്ടുണ്ടെന്നും ഉള്ള തെരഞ്ഞെടുപ്പ് കമ്മീഷന്റെ പ്രസ്താവന ശരിയാണെന്നും ഇന്ത്യാ ടുഡേ കണ്ടെത്തി.
