തിരുവനന്തപുരം: ടൂറിസം വകുപ്പ് സംഘടിപ്പിക്കുന്ന ഈ വര്ഷത്തെ സംസ്ഥാനതല ഓണം വാരാഘോഷം സെപ്തംബര് 3 മുതല് 9 വരെ നടക്കും. സെപ്തംബര് 9 ന് നടക്കുന്ന വര്ണ്ണാഭമായ ഘോഷയാത്ര മാനവീയം വീഥിയില് വൈകിട്ട് അഞ്ചിന് ഫ്ലാഗ് ഓഫ് ചെയ്യും. ഘോഷയാത്ര കിഴക്കേകോട്ടയില് അവസാനിക്കും.
ഓണാഘോഷത്തിന്റെ ഭാഗമായി തിരുവനന്തപുരം നഗരത്തിലെ കവടിയാര് മുതല് മണക്കാട് വരെയുള്ള പ്രദേശം ഉത്സവ മേഖലയായി പ്രഖ്യാപിക്കുകയും ഈ പ്രദേശം ദീപങ്ങളാല് അലങ്കരിക്കുകയും ചെയ്യും.
ഘോഷയാത്ര കടന്നുപോകുന്ന നഗരവീഥിയിലും പരിസരങ്ങളിലും ഹരിതചട്ടം ഉറപ്പാക്കാനും ഘോഷയാത്രാ കമ്മിറ്റി തീരുമാനിച്ചു. ഘോഷയാത്ര കമ്മിറ്റി വര്ക്കിംഗ് ചെയര്മാന് പൊതുവിദ്യാഭ്യാസ തൊഴില് വകുപ്പ് മന്ത്രി വി. ശിവന്കുട്ടി പങ്കെടുത്ത യോഗത്തില് കമ്മിറ്റി ചെയര്മാന് ഡി.കെ. മുരളി എംഎല്എ അധ്യക്ഷനായി. ഹരിതചട്ടത്തിന്റെ ഭാഗമായി ഘോഷയാത്ര കടന്നുപോകുന്ന വഴികളില് ബിന്നുകളും കുടിവെള്ള കൗണ്ടറുകളും സ്ഥാപിക്കും. ഫ്ളോട്ടുകളുടെ അവശിഷ്ടങ്ങള് നീക്കം ചെയ്യാന് തദ്ദേശ വകുപ്പിനു കീഴിലുള്ള ക്ലീന് കേരള കമ്പനിയെ പ്രയോജനപ്പെടുത്തും.
പരമാവധി 20 അടി നീളവും 10 അടി വീതിയും 16 അടി ഉയരത്തിലുമുള്ളവയായിരിക്കണം ഫ്ളോട്ടുകള്. ഫ്ളോട്ടുകളില് പുതുമയുണ്ടാകണമെന്നും ആവര്ത്തനവിരസമായ ആശയങ്ങളും രൂപകല്പ്പനയും ഒഴിവാക്കണമെന്നും ടൂറിസം ഡയറക്ടര് ശിഖ സുരേന്ദ്രന് പറഞ്ഞു. ടൂറിസം അഡീഷണല് സെക്രട്ടറി ജഗദീഷ് ഡി, ടൂറിസം അഡീഷണല് ഡയറക്ടര് (ജനറല്) ശ്രീധന്യ സുരേഷ്, വിവിധ വകുപ്പ് മേധാവികള് തുടങ്ങിയവരും യോഗത്തില് പങ്കെടുത്തു.
