കിളിമാനൂര്: മട്ടുപ്പാവില് ഡ്രാഗണ് ഫ്രൂട്ട് ചെടികള് നട്ട് മക്കളെ പോലെ പരിപാലിച്ച് വിജയ ഗാഥ രചിക്കുകയാണ് മടവൂരിലെ വീട്ടമ്മ. കഴിഞ്ഞ വര്ഷം 30,000രൂപയുടെ ഡ്രാഗണ് ഫ്രൂട്ടാണ് വിറ്റഴിച്ചത്. ഈ വര്ഷം കാലാവസ്ഥ മോശമായിട്ടും നല്ല വിളവ് ലഭിച്ചു. മടവൂര് ഗ്രാമ പഞ്ചായത്തിലെ നടുവത്തേല മുച്ചോട് ബിജി വിലാസത്തില് ബിജി അനി (46) ലാണ് വീട്ടമ്മമാര്ക്ക് മാതൃകയാകുന്ന തരത്തില് മട്ടുപ്പാവില് കൃഷിയുടെ മറ്റൊരു വിജയ ഗാഥ രചിക്കുന്നത്.
ത്രിപുര റൈഫിള്സ് ഉദ്യോഗസ്ഥന് അനില് കുമാറിന്റെ ഭാര്യയാണ് ബിജി. മടവൂര് കൃഷി ഭവനോട് ചേര്ന്നാണ് താമസം. പഞ്ചായത്തിലെ മികച്ച വനിതാ കര്ഷകയുമാണ്. കഴിഞ്ഞ നാലു വര്ഷമായി ഡ്രാഗണ് ഫ്രൂട്ട് കൃഷി വിജയകരമായി തുടരുകയാണ്. ചെടിച്ചട്ടികളില് നട്ടു വളര്ത്തി പൈപ്പുകളുടെ സഹായത്താല് താങ്ങുകള് കൊടുത്ത് ചെടികളെ പരിപാലിക്കുകയാണ് ചെയ്യുന്നത്.
സമീപത്തെ കൃഷി ഓഫീസില് നിന്നും മതിയായ മാര്ഗ നിര്ദേശങ്ങളും ലഭിക്കുന്നുണ്ട്. കഴിഞ്ഞ വര്ഷം മടവൂര് ഗ്രാമപഞ്ചായത്തിലെ ഡ്രാഗണ് ഫ്രൂട്ട് കൃഷിയില് മികച്ച കര്ഷകയ്ക്കുള്ള അവാര്ഡ് ബിജിക്കായിരുന്നു. കൃഷിയ്ക്ക് എല്ലാ പിന്തുണയുമായി മക്കളായ അഞ്ജലിയും അഞ്ജിതയും ബിജിയ്ക്ക് ഒപ്പമുണ്ട്. ഈ വര്ഷത്തെ വിളവെടുപ്പ് കഴിഞ്ഞ ദിവസം മടവൂര് ഗ്രാമപഞ്ചായത്ത് പ്രസിഡന്റ് എം. ബിജു കുമാര് നിര്വഹിച്ചു.
മടവൂര് കൃഷി ഓഫീസര് ആശാ. ബി. നായര് കൃഷി ഉദ്യോഗസ്ഥരായ മഹേഷ്. പി, നാന്സിഖാന്, ശ്രീകുമാര്. ജി എന്നിവരും വിളവെടുപ്പില് പങ്കെടുത്തു.
കിളിമാനൂര് ഗോവിന്ദ്
