മോസ്കോ: ഉക്രൈനുമായുള്ള യുദ്ധം അവസാനിപ്പിക്കാന് ആവശ്യപ്പെട്ടുകൊണ്ടുള്ള യുഎസ് പ്രസിഡന്റ് ഡൊണാള്ഡ് ട്രംപിന്റെ സമ്മര്ദം വര്ധിക്കുന്നതിനിടെ യുഎസുമായുള്ള 1987-ലെ ഇന്റര്മീഡിയറ്റ്-റേഞ്ച് ന്യൂക്ലിയര് ഫോഴ്സസ് (ഐഎന്എഫ്) ഉടമ്പടിയില്നിന്ന് റഷ്യ പിന്മാറി.
സോവിയറ്റ് കാലഘട്ടത്തിലെ ഉടമ്പടി പാലിക്കാനുള്ള ബാധ്യത ഇനി തങ്ങള്ക്ക് ഇല്ലെന്നും, മുന്പ് സ്വയം ഏര്പ്പെടുത്തിയ നിയന്ത്രണങ്ങള് ഇനി പാലിക്കില്ലെന്നും റഷ്യയുടെ വിദേശകാര്യ മന്ത്രാലയം അറിയിച്ചു.
ഹ്രസ്വ-ദൂര, മധ്യ-ദൂര ആണവ മിസൈലുകള് വിന്യസിക്കുന്നതിനുള്ള മൊറട്ടോറിയമായിരുന്നു ഐഎന്എഫ് ഉടമ്പടി. യുഎസും സോവിയറ്റ് യൂണിയനും ഒപ്പുവെച്ച ഉടമ്പടിയായിരുന്നു ഇത്.
യൂറോപ്പിലും ഏഷ്യ-പസഫിക് മേഖലയിലും, യുഎസിന്റെ മധ്യ-ദൂര, ഹ്രസ്വ-ദൂര മിസൈലുകള് വിന്യസിക്കുന്ന സാഹചര്യം കണക്കിലെടുത്ത്, സമാനമായ ആയുധങ്ങള് വിന്യസിക്കുന്നതില് ഏകപക്ഷീയമായ മൊറട്ടോറിയം നിലനിര്ത്താനുള്ള സാഹചര്യങ്ങള് ഇല്ലാതായതായി വ്യക്തമായിരിക്കുന്നു, റഷ്യന് വിദേശകാര്യ മന്ത്രാലയം പുറത്തിറക്കിയ പ്രസ്താവനയില് പറയുന്നു.
2019ല് റഷ്യ ഉടമ്പടി പാലിക്കുന്നില്ലെന്ന് ചൂണ്ടിക്കാട്ടി യുഎസ് ഇന്റര്മീഡിയറ്റ്-റേഞ്ച് ന്യൂക്ലിയര് ഫോഴ്സസ് ഉടമ്പടിയില് നിന്ന് പിന്മാറിയിരുന്നു.
