ന്യൂദല്ഹി: ആര് എസ് എസ് ശതാബ്ദിയുടെ ഭാഗമായി സര്സംഘചാലക് ഡോ. മോഹന് ഭാഗവത് പങ്കെടുക്കുന്ന ആദ്യ സംവാദ പരമ്പര 26 ന് ആരംഭിക്കും. 26 മുതല് 28 വരെ വൈകിട്ട് 5.30 ന് ദല്ഹി വിജ്ഞാന് ഭവനിലാണ് അദ്ദേഹം ക്ഷണിക്കപ്പെട്ട സദസിനെ അഭിസംബോധന ചെയ്യുന്നതെന്ന് അഖില ഭാരതീയ പ്രചാര്പ്രമുഖ് സുനില് ആംബേക്കര് വാര്ത്താ സമ്മേളനത്തില് അറിയിച്ചു. നൂറ് വര്ഷത്തെ സംഘയാത്ര: പുതിയ ചക്രവാളങ്ങള് എന്ന തലക്കെട്ടിലാകും പരിപാടി.
ദല്ഹിക്ക് പുറമേ ബെംഗളൂരു, കൊല്ക്കത്ത, മുംബൈ നഗരങ്ങളിലും സമാനമായ രീതിയില് ത്രിദിന സംവാദ പരമ്പരയില് സര്സംഘചാലക് പങ്കെടുക്കുമെന്ന് സുനില് ആംബേക്കര് പറഞ്ഞു.
നൂറ് വര്ഷമായി തുടരുന്ന ആര് എസ് എസ് പ്രവര്ത്തനവും മുന്നോട്ടുള്ള കാഴ്ചപ്പാടുകളും അദ്ദേഹം അവതരിപ്പിക്കും. വ്യത്യസ്തമേഖലകളില് നിന്ന് ക്ഷണിക്കുന്ന പ്രമുഖ വ്യക്തികളെയാകും സര്സംഘചാലക് അഭിസംബോധന ചെയ്യുക. സമാജത്തിലെ എല്ലാ വിഭാഗത്തിലുമുള്ളവരുമായി സംഘം പുലര്ത്തുന്ന സഹജമായ സമ്പര്ക്കത്തിന്റെ തന്നെ ഭാഗമാണ് ഈ പരിപാടിയെന്ന് സുനില് ആംബേക്കര് പറഞ്ഞു.
സമൂഹത്തെയാകെ ഒരുമിച്ച് ചേര്ത്ത് രാഷ്ട്രത്തിന്റെ വികാസ പ്രവര്ത്തനത്തില് മുന്നോട്ടു പോവുകയാണ് ലക്ഷ്യം. തനിമയിലൂന്നിയ വികസനമാണ് വേണ്ടത്. ധാര്മ്മിക, സാംസ്കാരിക, സാമൂഹിക, സാമ്പത്തിക, വൈജ്ഞാനിക മേഖലകളിലെയെല്ലാം പ്രമുഖരെ ചേര്ത്ത് രാഷ്ട്രത്തിന്റെ മുന്നേറ്റത്തിനായി ചിന്തിക്കുകയാണ് ലക്ഷ്യം വയ്ക്കുന്നതെന്ന് സുനില് ആംബേക്കര് കൂട്ടിച്ചേര്ത്തു. ആര്എസ്എസ് ദല്ഹി പ്രാന്ത സംഘചാലക് ഡോ അനില് അഗര്വാളും വാര്ത്താ സമ്മേളനത്തില് പങ്കെടുത്തു.
