വടകര: പൂര്വ്വ വിദ്യാര്ത്ഥിനിയുടെ പീഡന പരാതിയില് സിപിഎം അനുകൂല കോളജ് അധ്യാപക സംഘടനയായ എകെജിസിടി നേതാവായ അധ്യാപകനെതിരെ പോലീസ് കേസ്. മടപ്പള്ളി കോളജിലെ അധ്യാപകനായിരുന്ന ഡോ. പി.എസ്. ജിനീഷിനെതിരെയാണ് ചോമ്പാല പോലീസ് ജാമ്യമില്ലാ വകുപ്പുകള് ചുമത്തി കേസെടുത്തത്.
ഇപ്പോള് എറണാകുളം മഹാരാജാസ് കോളജിലെ ചരിത്ര വിഭാഗം അസോസിയേറ്റ് പ്രൊഫസറാണ് ഡോ. ജിനീഷ്. ഇദ്ദേഹം മടപ്പള്ളി കോളജില് പഠിപ്പിച്ചിരുന്ന കാലത്താണ് പരാതിക്കിടയാക്കിയ സംഭവം നടന്നത്. സോഷ്യല് മീഡിയയിലൂടെയാണ് യുവതി ആദ്യം അധ്യാപകനെതിരെ ഗുരുതര ആരോപണങ്ങള് ഉന്നയിച്ചത്. മടപ്പള്ളി കോളജില് പഠിച്ച അവസരത്തില് ലൈംഗികാതിക്രമങ്ങള് നേരിട്ടുവെന്നായിരുന്നു വെളിപ്പെടുത്തല്. കഴിഞ്ഞദിവസമാണ് യുവതി ചോമ്പാല പോലീസിനെ സമീപിച്ചത്. യുവതിയുടെ പരാതിയുടെ അടിസ്ഥാനത്തില് ജിനീഷിനെതിരെ പോലീസ് കേസെടുത്തെങ്കിലും ഇതുവരെ കസ്റ്റഡിയിലെടുത്തിട്ടില്ല. അന്വേഷണം നടക്കുകയാണെന്ന് പോലീസ് അറിയിച്ചു.
