തമിഴ് നാട്ടിലെ വോട്ടര്‍ പട്ടികയെക്കുറിച്ച് കള്ള പ്രചാരണവുമായി ചിദംബരം, പൊളിച്ചടുക്കി തിരഞ്ഞെടുപ്പ് കമ്മീഷന്‍

ന്യൂഡല്‍ഹി: തമിഴ്നാട്ടിലെ വോട്ടര്‍ പട്ടികയില്‍ 6.5 ലക്ഷം കുടിയേറ്റ തൊഴിലാളികളെ ചേര്‍ത്തുവെന്ന മുതിര്‍ന്ന കോണ്‍ഗ്രസ് നേതാവ് പി ചിദംബരത്തിന്‌റെ ആരോപണം തെറ്റിദ്ധരിപ്പിക്കുന്നതും അടിസ്ഥാനരഹിതവുമാണെന്ന് തിരഞ്ഞെടുപ്പ് കമ്മീഷന്‍ ഫാക്ട് ചെക്കിംഗ് വിഭാഗം വ്യക്തമാക്കി. തെരഞ്ഞെടുപ്പ് പ്രക്രിയ തടസ്സപ്പെടുത്തുന്നതിനായി ഇത്തരം തെറ്റായ വിവരങ്ങള്‍ മനഃപൂര്‍വ്വം മാധ്യമങ്ങളില്‍ പ്രചരിപ്പിക്കുകയാണെന്ന് അവര്‍ പറഞ്ഞു.
ബീഹാറില്‍ നിന്ന് മറ്റ് സംസ്ഥാനങ്ങളിലേക്ക് സ്ഥിരമായി മാറി ആ സംസ്ഥാനങ്ങളില്‍ സാധാരണയായി താമസിക്കുന്ന വോട്ടര്‍മാരെ സംബന്ധിച്ചിടത്തോളം, സ്‌പെഷ്യല്‍ ഇന്റന്‍സീവ് റിവിഷന്‍ (എസ്ഐആര്‍) നടത്തിയശേഷം മാത്രമേ കൃത്യമായ കണക്കുകള്‍ അറിയാന്‍ കഴിയൂ. 1950 ലെ ആര്‍പി ആക്ട് അനുസരിച്ച് സാധാരണയായി താമസിക്കുന്ന മണ്ഡലത്തില്‍ വോട്ടര്‍ പട്ടികയില്‍ പേര് ചേര്‍ക്കാം. എന്നാല്‍, തമിഴ്നാട്ടിലെ 6.5 ലക്ഷം വോട്ടര്‍മാരുടെ പേര് പട്ടികയില്‍ ചേര്‍ക്കുന്നതിനെക്കുറിച്ച് തെറ്റായ കണക്കുകളാണ് പ്രചരിക്കുന്നത്. തമിഴ്നാട്ടില്‍ ഇതുവരെ എസ്ഐആര്‍ പുറത്തിറക്കിയിട്ടില്ല. അതിനാല്‍ ബീഹാറിലെ എസ്ഐആറിനെ തമിഴ്നാട്ടുമായി ബന്ധിപ്പിക്കുന്നത് അസംബന്ധമാണ്. എസ്ഐആറുമായി ബന്ധപ്പെട്ട് തെറ്റായ പ്രസ്താവനകള്‍ നടത്തുന്നത് ഒഴിവാക്കണമെന്ന് തിരഞ്ഞെടുപ്പ് കമ്മീഷന്‍ ആവശ്യപ്പെട്ടു.