പാലക്കാട്: മകളെ ശല്യപ്പെടുത്തിയത് ചോദ്യം ചെയ്ത പിതാവിന്റെ ഓട്ടോറിക്ഷ യുവാവ് കത്തിച്ചു. പാലക്കാട് മേപ്പറമ്പില് റഫീഖിന്റെ ഓട്ടോറിക്ഷയാണ് കത്തിച്ചത്. സംഭവത്തില് പ്രദേശവാസിയായ ആഷിഫിനെ(30) പൊലീസ് അറസ്റ്റ് ചെയ്തു.
ഇന്നലെ അര്ദ്ധരാത്രിയാണ് റഫീഖിന്റെ വീടിന് മുന്നില് പാര്ക്ക് ചെയ്തിരുന്ന ഓട്ടോറിക്ഷ യുവാവ് കത്തിച്ചത്. പതിനഞ്ച് വയസുള്ള മകളെ ആഷിഫ് പിന്നാലെ നടന്ന് ശല്യം ചെയ്തത് റഫീഖ് ചോദ്യം ചെയ്തിരുന്നു.
ഭാര്യയും നാല് മക്കളുമുളള റഫീഖിന്റെ ഏക വരുമാനമാര്ഗമാണ് ഇല്ലാതായത്.മുന്നോട്ടുളള ജീവിതം ചോദ്യചിഹ്നമാണെന്ന് റഫീഖ് പറഞ്ഞു.അതിനിടെ കേസ് ഒത്തുതീര്പ്പാക്കാന് പ്രതിയുടെ ബന്ധുക്കള് ശ്രമിക്കുന്നതായി സൂചനയുണ്ട്.പണം നല്കാമെന്നും കേസ് പിന്വലിക്കണമെന്നും ആവശ്യപ്പെട്ട് റഫീഖിന്റെ കുടുംബ സുഹൃത്തിനെ ആഷിഫിന്റെ ബന്ധുക്കള് കണ്ടു.എന്നാല് ഒത്തുതീര്പ്പിന് തയ്യാറല്ലെന്ന് റഫീഖ് അറിയിച്ചു.
