ന്യൂദല്ഹി: റഷ്യയില് നിന്നും എണ്ണ വാങ്ങരുതെന്ന യൂറോപ്യന് രാജ്യങ്ങളുടെയും അമേരിക്കയുടെയും വിലക്കിന് ഇന്ത്യ വഴങ്ങുന്നില്ലെന്ന് കണ്ടതോടെ ഇന്ത്യയെ പല രീതിയില് സമ്മര്ദ്ദത്തിലാക്കാന് ശ്രമിക്കുകയാണ് യുഎസ് പ്രസിഡന്റ് ട്രംപ്. അതിന്റെ തുടര്ച്ചയാണ് ഇന്ത്യയുടെ സമ്പദ് വ്യവസ്ഥ മരണതുല്യമാണെന്ന ട്രംപിന്റെ പ്രസ്താവന. ലോക ബാങ്കും ഐഎംഎഫും പോലുള്ള സാമ്പത്തിക ഏജന്സികള് ഇന്ത്യയുടെ സമ്പദ് വ്യവസ്ഥയെ ലോകത്തിലെ ഏറ്റവും വേഗത്തില് വളരുന്ന സമ്പദ് വ്യവസ്ഥയെന്ന് വിശേഷിപ്പിച്ചതിനെ മുഴുവന് കാറ്റില് പറത്തുന്നതാണ് ട്രംപിന്റെ ഈ പ്രസ്താവന.
ട്രംപിന്റെ ഈ പ്രസ്താവന കേട്ടയുടന് രാഹുല് ഗാന്ധി ആഹ്ളാദം പ്രകടിപ്പിക്കുകയാണ്. ഇന്ത്യയുടെ സമ്പദ് വ്യവസ്ഥ മരണതുല്യമാണെന്ന് ധനമന്ത്രിക്കും പ്രധാനമന്ത്രിക്കും ഒഴികെ ഇന്ത്യയില് എല്ലാവര്ക്കും അറിയാമെന്നാണ് രാഹുല് ഗാന്ധി ഇതിനോട് പ്രതികരിച്ചത്. എത്ര നിരുത്തരവാദിത്വപരമായ പ്രതികരണമാണ് രാഹുല് ഗാന്ധി നടത്തിയതെന്ന് സാമ്പത്തിക വിദഗ്ധര് ചൂണ്ടിക്കാട്ടുന്നു.
കാരണം ലോകത്തിലെ ഏറ്റവും വേഗത്തില്വളരുന്ന സമ്പദ് വ്യവസ്ഥയാണ് ഇന്ത്യയുടേത് എന്ന് പറഞ്ഞത് മോദിയല്ല. ലോകബാങ്കും ഐഎംഎഫും ആണ്. ഇന്ത്യയുടെ മൊത്തആഭ്യന്തരോല്പാദനവും വിലയിരുത്തിയാണ് ഈ ആഗോള ഏജന്സികള് ഇത് പറഞ്ഞത്. യുദ്ധവും മറ്റും ഉയര്ത്തുന്ന പ്രതിസന്ധിയ്ക്കിടയിലും ഇന്ത്യയുടെ സമ്പദ് വ്യവസ്ഥ 6.4 ശതമാനം എന്ന തോതില് വളരുമെന്നും ലോകത്തിലെ മറ്റു രാജ്യങ്ങളിലെ സാമ്പത്തിക വളര്ച്ചയേക്കാള് ഏറെ മുന്നിലാണ് ഇന്ത്യയെന്നും ഐഎംഎഫ് പറഞ്ഞതാണ്.
ഇത്തരം വസ്തുനിഷ്ടകണക്കുകള് മുന്നിലുള്ളപ്പോള് ട്രംപിന്റെ പ്രസ്താവന വെറും രാഷ്ട്രീയ യുദ്ധമാണെന്ന് എല്ലാവര്ക്കും അറിയാം. ഇതിന് മോദി ട്രംപിനെ വിമര്ശിക്കണമെന്നാണ് മല്ലികാര്ജുന് ഖാര്ഗെയുടെ ആവശ്യം. മോദിയെയും ട്രംപിനെയും വാക് യുദ്ധം നടത്തിച്ച് നയതന്ത്രബന്ധങ്ങള് വഷളാക്കാമെന്ന വിലകുറഞ്ഞ കണക്കുകൂട്ടലാണ് രാഹുല് ഗാന്ധിയും മല്ലികാര്ജുന് ഖാര്ഗെയും പ്രകടിപ്പിക്കുന്നത്.
2028ല് ഇന്ത്യയുടെ സമ്പദ്ഘടന 5.7 ലക്ഷം കോടി ഡോളര് ആകുന്നതോടെ ഇന്ത്യ ജര്മ്മനിയെ മറികടന്ന് ലോകത്തിലെ മൂന്നാമത്തെ സാമ്പത്തിക ശക്തിയായി ഉയരുമെന്നാണ് അമേരിക്ക ആസ്ഥാനമായി പ്രവര്ത്തിക്കുന്ന സാമ്പത്തിക ഏജന്സിയായ മോര്ഗന് സ്റ്റാന്ലി പ്രവചിച്ചിട്ട് മഷി ഉണങ്ങിയിട്ട് പോലുമില്ല. 2023ല് വെറും 3.5 ലക്ഷം കോടി ഡോളര് മാത്രമായിരുന്ന ഇന്ത്യന് സമ്പദ്ഘടന 2026ല് 4.7 ലക്ഷം കോടി ഡോളറാവുമെന്നും ഇത് 2028ല് 5.7 ലക്ഷം കോടി ഡോളര് ആകുമെന്നും ആണ് കണക്കുകള് നിരത്തി മോര്ഗന് സ്റ്റാന്ലി പ്രവചിക്കുന്നത്.
