പെരുമ്പാവൂർ : സ്റ്റുഡൻ്റ് പോലീസ് കേഡറ്റ് പദ്ധതിയുടെ പതിനഞ്ചാം വാർഷികം എറണാകുളം റൂറൽ ജില്ലയിൽ വിപുലമായ രീതിയിൽ നടത്തും. ആഗസ്റ്റ് രണ്ടിന് രാവിലെ 8 ന് ആലുവ കീഴ്മാട് മോഡൽ റസിഡൻഷ്യൽ സ്കൂളിൽ വ്യവസായ, നിയമ വകുപ്പ് മന്ത്രി പി.രാജീവ് പരേഡിൽ സല്യൂട്ട് സ്വീകരിച്ച് പരിപാടി ഉദ്ഘാടനം ചെയ്യും. പോലീസിലെയും മറ്റ് വിവിധ വകുപ്പുകളിലെയും മേലധികാരികളും ചടങ്ങിൽ സംബന്ധിക്കും.
നിയമങ്ങൾ സ്വമേധയാ അനുസരിക്കുകയും ആദരിക്കുകയും ചെയ്യുന്ന, പൗരബോധം ജനാധിപത്യ മര്യാദകൾ എന്നിവ പാലിക്കുന്ന, നിസ്വാർത്ഥമായ സാമൂഹ്യ സേവനം ജീവിതചര്യയായി കരുതുന്ന ഒരു പുതിയ തലമുറയെ വാർത്തെടുക്കുക എന്ന ലക്ഷ്യത്തോടെ ആരംഭിച്ച സ്റ്റുഡൻ്റ് പോലീസ് കേഡറ്റ് പദ്ധതി റൂറൽ ജില്ലയിൽ 2010 കാലഘട്ടത്തിൽ ആലുവ ബോയ്സ് ഹയർസെക്കൻഡറി സ്കൂൾ, എളന്തിക്കര ഹൈസ്കൂൾ, കോലഞ്ചേരി സെൻ്റ് പീറ്റേഴ്സ് വൊക്കേഷണൽ ഹയർസെക്കൻഡറി സ്കൂൾ എന്നിവിടങ്ങളിലാണ് ആദ്യമായി ആരംഭിച്ചത്.
നിലവിൽ 52 സ്കൂളുകളിൽ പദ്ധതി വിജയകരമായി നടന്നുവരുന്നു. ഓരോ സ്കൂളിലും രണ്ട് കമ്മ്യൂണിറ്റി പോലീസ് ഓഫീസർമാർ ഉൾപ്പെടെ 104 പേരും, പരേഡ് പരിശീലിപ്പിക്കുന്നതിനായി രണ്ടുപേരടങ്ങുന്ന 104 പേരുമാണ് ഉള്ളത്.
അഡീഷണൽ ജില്ലാ പോലീസ് സൂപ്രണ്ടാണ് പദ്ധതിയുടെ ജില്ലാ നോഡൽ ഓഫീസർ . തുടർന്ന് അഡീഷണൽ ജില്ല നോഡൽ ഓഫീസറും , കോർ ടീമും ഇതിന്റെ കീഴിൽ അഞ്ച് സബ് ഡിവിഷനിലും ഓരോ പോലീസ് ഓഫീസറും അടങ്ങുന്ന ടീമാണ് പദ്ധതിയെ മുന്നോട്ട് നയിക്കുന്നത്.
