തൃശൂര്: അഗതി മന്ദിരത്തില് പിതാവ് മരിച്ചതറിഞ്ഞ മകനും മരുമകളും വീട് പൂട്ടി മുങ്ങി.ഇതോടെ പിതാവിന്റെ മൃതദേഹം വീടിനുള്ളിലേക്ക് കയറ്റാനായില്ല.
മൃതദേഹം വീടിന് പുറത്ത് വച്ച് കാത്തിരുന്നിട്ടും മകന് എത്തിയില്ല.ഫോണ് സ്വിച്ച് ഓഫ് ചെയ്ത് മകന് പിതാവിന്റെ അന്ത്യയാത്രാ ചടങ്ങുകളില് പങ്കെടുക്കാതെ മാറി നിന്നെന്ന് ബന്ധുക്കള് പറഞ്ഞു.
അരിമ്പൂര് കൈപ്പിള്ളി റിംഗ് റോഡില് തോമസ് (78) ബുധനാഴ്ച രാവിലെയാണ് മണലൂരിലെ അഗതി മന്ദിരത്തില് മരിച്ചത്. മകനും മരുമകളും മര്ദ്ദിക്കുന്നെന്ന് പരാതിപ്പെട്ട് തോമസ്, ഭാര്യ റോസിലിയോടൊപ്പം ഏതാനും മാസം മുന്പാണ് വീട് വിട്ട് ഇറങ്ങിയത്. ഇത് സംബന്ധിച്ച് ഇവര് അന്തിക്കാട് പൊലീസില് പരാതിയും നല്കി.
നാട്ടുകാര് അറിയിച്ച പ്രകാരം സാമൂഹിക നീതി വകുപ്പ് ഉദ്യോഗസ്ഥര് എത്തി ഇവരെ മണലൂരിലെ അഗതി മന്ദിരത്തിലേക്ക് മാറ്റി. തുടര്ന്ന് തോമസും റോസിലിയും മണലൂരിലെ അഗതി മന്ദിരത്തിലാണ് കഴിഞ്ഞിരുന്നത്.
ഇതിനിടെയാണ് ബുധനാഴ്ച രാവിലെ തോമസ് മരിച്ചത്. വിവരം അധികൃതര് മകനെ അറിയിച്ചു. നടപടിക്രമങ്ങള് പൂര്ത്തിയാക്കി മൃതദേഹം വീട്ടിലെത്തിച്ചപ്പോഴാണ് മകന് വീട് പൂട്ടിപ്പോയ വിവരം അറിയുന്നത്.
മകന് വീട് പൂട്ടി പോയതിനെ തുടര്ന്ന് വീട്ട്മുറ്റത്ത് മൃതദേഹം കിടത്തി അന്ത്യയാത്രാ കര്മ്മങ്ങള് നടത്തി. വൈകിട്ട് എറവ് സെന്റ് തെരേസാസ് പള്ളിയില് സംസ്കാരം നടത്തി.
