കൊച്ചി: ശബരിമല ക്ഷേത്രത്തില് ഫോട്ടോയും വീഡിയോയും എടുക്കുന്നതിന് കര്ശന നിയന്ത്രണങ്ങള് ഏര്പ്പെടുത്തി ഹൈക്കോടതി . ദേവസ്വം ബോര്ഡും ക്ഷേത്ര സുരക്ഷാ ഏജന്സിയും അംഗീകരിച്ച മാധ്യമ പ്രവര്ത്തകര്ക്ക് മാത്രമേ പ്രവേശനത്തിനായുള്ള ഐഡി കാര്ഡുകള് നല്കാവൂയെന്നും കോടതി നിര്ദേശിച്ചു. മണ്ഡല-മകരവിളക്ക് കാലത്ത് മാധ്യമപ്രവര്ത്തകരും ജീവനക്കാരും ഉള്പ്പെടെയുള്ളവര് മുന് കോടതി ഉത്തരവുകള് ലംഘിച്ചതായുള്ള റിപ്പോര്ട്ടുകളെ തുടര്ന്നാണ് ഈ നിര്ദേശം.
പതിനെട്ടാംപടിക്ക് മുകളില് ചിത്രീകരണം കര്ശനമായി വിലക്കി. സോപാനം , മേലേത്തിരുമുറ്റം പോലുള്ളയിടങ്ങളില് ഡ്രോണുകള് , ട്രൈപോഡുകള് എന്നിവയുടെ ഉപയോഗവും കോടതി നിരോധിച്ചു. ദേവസ്വത്തിന്റെയും പോലീസ് ഉദ്യോഗസ്ഥരുടെയും അനുമതിയോടെ, അംഗീകൃത സ്ഥലങ്ങളില് നിന്ന് മാത്രമേ ക്ഷേത്ര പരിപാടികളുടെ തത്സമയ സംപ്രേഷണം നടത്താന് പാടുള്ളൂ. തന്ത്രി , പോലീസ്, മറ്റ് അധികാരികള് എന്നിവരുമായി സഹകരിച്ച് ഇക്കാര്യത്തില് പുതിയ നയം രൂപീകരിക്കാന് തിരുവിതാംകൂര് ദേവസ്വം ബോര്ഡിനോട് കോടതി ആവശ്യപ്പെട്ടു .
