കണ്ണൂര് : ചെമ്പല്ലിക്കുണ്ട് പുഴയില് യുവതി കുഞ്ഞുമായി ചാടിയ ജീവനൊടുക്കിയ സംഭവത്തില് കുട്ടിയുടെ മൃതദേഹം കണ്ടെത്തി. ചെമ്പല്ലിക്കുണ്ട് പാലത്തിന്റെ താഴെയാണ് മൃതദേഹം കണ്ടെത്തിയത്.
കുട്ടിയുടെ അമ്മ റീമയുടെ മൃതദേഹം സംഭവം നടന്ന ഞായറാഴ്ച തന്നെ കണ്ടെത്തിയിരുന്നു. ഭര്തൃ വീട്ടിലെ മാനസിക പീഡനത്തില് മനംനൊന്താണ് ആത്മഹത്യ എന്നാണ് റീമയുടെ കുടുംബം ആരോപിച്ചത്. കേസില് പൊലീസ് അന്വേഷണം തുടരുകയാണ്.
മൂന്ന് വയസുള്ള മകനെ ഷാള് ഉപയോഗിച്ച ശരീരത്തോട് ചേര്ത്ത് കെട്ടി വച്ചാണ് റീമ ചെമ്പല്ലിക്കുണ്ട് പാലത്തില് നിന്ന് പുഴയിലേക്ക് ചാടിയത്. ഈ സമയം പുഴയില് ചൂണ്ടയിടുകയായിരുന്ന യുവാവ് റീമ ചാടുന്നത് കണ്ടു മറ്റുളളവരെ വിവരമറിയിച്ചു.
തുടര്ന്ന് നടത്തിയ തിരച്ചിലില് പാലത്തില് നിന്ന് 200 മീറ്റര് അകലെ റീമയുടെ മൃതദേഹം കണ്ടെത്തി. ഒരാഴ്ച്ച മുമ്പ് ഗള്ഫില് നിന്ന് എത്തിയ ഭര്ത്താവ് കുട്ടിയെ തിരികെ വേണമെന്ന് സമ്മര്ദ്ദം ചെലുത്തി. ഇതാണ് ആത്മഹത്യയിലേക്ക് നയിച്ചതെന്നാണ് റീമയുടെ ബന്ധുക്കളുടെ ആരോപണം.ഭര്ത്താവിമായി സ്വര ചേര്ച്ചയിലായിരുന്നില്ല.
