ഷാര്ജ : മലയാളി യുവതി അതുല്യയെ ഷാര്ജയില് ഫ്ലാറ്റില് മരിച്ച നിലയില് കണ്ടെത്തിയ സംഭവത്തില് ഭര്ത്താവ് സതീഷിനെതിരെ കൊലക്കുറ്റം ചുമത്തി തെക്കും ഭാഗം പൊലീസ് കേസെടുത്തതിന് പിന്നാലെ വിശദീകരണവുമായി ഭര്ത്താവ് രംഗത്തെത്തി.
അതുല്യ പുതിയ ജോലിക്ക് ശനിയാഴ്ച മുതല് പോകാനിരുന്നതാണ്. പുറത്ത് പോയിരുന്ന താന് തിരികെ വന്നപ്പോഴാണ് അതുല്യയെ തൂങ്ങി മരിച്ച നിലയില് കണ്ടതെന്ന് സതീഷ് പറഞ്ഞു.
താന് വീട്ടുകാരുമായി സംസാരിക്കുന്നത് അതുല്യ ഇഷ്ടപ്പെട്ടിരുന്നില്ല. അഞ്ച് വര്ഷമായി അവരുമായി ബന്ധമില്ല. താന് സുഹൃത്തുക്കള്ക്കൊപ്പം പോകുന്നതും ഭാര്യക്ക് ഇഷ്ടമല്ല. അതുല്യ ഗര്ഭമലസിപ്പിച്ചത് തന്നെ മനസികമായി തളര്ത്തി. കൊല്ലത്തെ ആശുപത്രിയിലാണ് ഗര്ഭമലസിപ്പിച്ചത്. ആ സമയത്ത് മദ്യപിച്ചെന്നും അന്ന് മുതല് തമ്മില് മാനസികമായി അകന്നുവെന്നും സതഷ് പറഞ്ഞു.
അതുല്യയുടെ അച്ഛന് പറയുന്നതുപോലെ ഉള്ള പ്രശ്നങ്ങള് ഒന്നും ഇല്ല. ഭാര്യ തന്നെ മര്ദ്ദിക്കാറുണ്ട്. കൈ ഒടിഞ്ഞ സമയത്തുപോലും അതുല്യ തന്നെ ബെല്റ്റ് കൊണ്ട് അടിച്ചു. തന്റെ ദേഹത്തു മുഴുവന് പാടുകള് ഉണ്ടെന്നും തനിക്ക് 2 ലക്ഷം രൂപ ശമ്പളം ഉണ്ടെന്നും സതീഷ് വെളിപ്പെടുത്തി.ഇപ്പോള് കയ്യില് പണമില്ല. താന് മദ്യപിക്കാറുണ്ട്. അപ്പോള് ഗര്ഭമലസിപ്പിച്ചത് ഓര്മ വരികയും വഴക്ക് ഉണ്ടാകുകയും ചെയ്യും. അത് അതുല്യ വീഡിയോ എടുക്കും. ആ വീഡിയോ ഇപ്പോള് തനിക്ക് നെഗറ്റീവ് ആയെന്നും സതീഷ് പറഞ്ഞു.
നാട്ടില് വീടിന്റെ വാടക ഉള്പ്പെടെ അതുല്യയുടെ അമ്മയാണ് കൈപ്പറ്റുന്നത്. അതുല്യയുടെ സ്വര്ണം താന് എടുത്തില്ല. എന്ത് ചെയ്തു എന്ന് പോലും അന്വേഷിച്ചില്ല. ഇപ്പോള് നാട്ടില് പോകാന് പറ്റാത്ത സാഹചര്യമാണ്. തനിക്ക് സത്യം അറിയണം. ഫ്ലാറ്റിലെ ക്യാമറ പരിശോധിക്കണമെന്നും സതീഷ് ആവശ്യപ്പെട്ടു.
ഫ്ലാറ്റിന് ഒറ്റ താക്കോലേ ഉണ്ടായിരുന്നുള്ളൂ. താനും ആത്മഹത്യാ ശ്രമം നടത്തിയെന്നും സതീഷ് പറഞ്ഞു.
ചവറ തെക്കുംഭാഗം സ്വദേശിനിയായ അതുല്യ (30) യുടെ മരണത്തിലാണ് ശാസ്താംകോട്ട സ്വദേശി ഭര്ത്താവ് സതീഷിനെതിരെ കേസെടുത്തത്. സ്ത്രീധന പീഡനം, ശാരീരിക പീഡനം എന്നീ ഗുരുതര വകുപ്പുകളും ഇയാള്ക്കെതിരെ ചുമത്തി.
