കണ്ണൂര്: വെളിച്ചെണ്ണ വില കുതിച്ചുയരുന്ന സാഹചര്യത്തില് ബിപിഎല് കാര്ഡ് ഉടമകള്ക്ക് സബ്സിഡി സഹായം പരിഗണിച്ച് കേരഫെഡ്. ഓണക്കാലത്ത് വില കൂടുതല് ഉയരുമെന്നതിനാലാണ് സബ്സിഡി നിരക്കില് വെളിച്ചെണ്ണ വിതരണം ചെയ്യുന്നതിനുള്ള ആലോചന. ഇതു സംബന്ധിച്ച ശിപാര്ശ സര്ക്കാരിന്റെ അനുമതിയ്ക്കായി സമര്പ്പിക്കുമെന്ന് കേരഫെഡ് ചെയര്മാന് വി. ചാമുണ്ണി, എം.ഡി. സാജു സുരേന്ദ്രന്, വൈസ് ചെയര്മാന് കെ. ശ്രീധരന് എന്നിവര് വാര്ത്താ സമ്മേളനത്തില് അറിയിച്ചു.
ആഗോളതലത്തില് വെളിച്ചെണ്ണ വിലയില് 41% വര്ധനയും രാജ്യത്ത് 60% വര്ധനയും ഉണ്ടായിട്ടുണ്ട്. ലോകബാങ്കിന്റെ റിപ്പോര്ട്ട് പ്രകാരം 2026 പകുതിയാകുമ്പോള് നിലവിലെ വിലക്കയറ്റത്തില് രണ്ടു ശതമാനത്തിന്റെ കുറവുണ്ടാകുമെന്നാണ് കണക്കാക്കുന്നത്. വിപണിയില് കൊപ്രയുടെ വില 2025 രണ്ടാം പാദത്തില് മുന്വര്ഷവുമായി താരതമ്യം ചെയ്യുമ്പോള് 75% വര്ധിച്ചു. കേരളത്തില് മെയ് ഒന്നിന് ക്വിന്റലിന് 17,800 രൂപയായിരുന്ന കൊപ്രയുടെ വില ജൂണ് 22ന് 23,900 രൂപയായി കുതിച്ചുയര്ന്നു. 52 ദിവസത്തില് 6,100 രൂപയുടെ വര്ധന.
കേരഫെഡിന്റെ കണക്കുകള് പ്രകാരം 2024 ഒക്ടേബറില് കിലോഗ്രാമിന് 125 രൂപയായിരുന്ന കൊപ്രയുടെ സംഭരണ വില 2025 ജൂണില് 230 രൂപയായി ഉയര്ന്നു – ഇത് 84% വര്ധനയാണ്. വെളിച്ചെണ്ണയുടെ വില ഒരു ലിറ്ററിന് 245 രൂപയില് നിന്ന് 419 രൂപയായി ഉയര്ന്നു ( 71% വര്ധന).
കേരാഫെഡ് മലപ്പുറം, കോഴിക്കോട്, പാലക്കാട് ജില്ലകളില് ഇസാഫുമായി സഹകരിച്ച് സംഭരണ കേന്ദ്രങ്ങള് ആരംഭിക്കുമെന്നും കര്ഷകര്ക്ക് മികച്ച വരുമാനം ഉറപ്പാക്കാനാണ് വിപണി വിലയേക്കാള് കൂടുതല് വിലയ്ക്ക് പച്ചത്തേങ്ങ സംഭരിക്കുന്നത്.
ഓണവിപണി ലക്ഷ്യമാക്കി ജൂലൈ 20 മുതല് കൂടുതല് ഷിഫ്റ്റുകള് അനുവദിച്ച് ഉത്പാദനം വര്ദ്ധിപ്പിക്കും. ഉയര്ന്ന വിലയില് വെളിച്ചെണ്ണ വിറ്റഴിക്കാനുള്ള ആവേശത്തില് ഓണത്തിന് വ്യാജ വെളിച്ചെണ്ണ വിപണിയില് വ്യാപകമായി ഇറങ്ങാന് സാധ്യതയുണ്ടെന്നും കേരഫെഡ് മുന്നറിയിപ്പ് നല്കി.
