തിരുവനന്തപുരം: വൈക്കം മുഹമ്മദ് ബഷീറിന്റെ മതിലുകള് പ്രസിദ്ധീകരിച്ചതിന്റെ 60-ാം വര്ഷത്തില് സ്നേഹ മതില് തീര്ത്ത് കുട്ടികള്. കരമന ഗവ. ബോയ്സ് ഹയര് സെക്കണ്ടറി സ്കൂളിലെ വിദ്യാര്ത്ഥികളാണ് സ്നേഹമതില് തീര്ത്തത്.
സ്കൂള് മൈതാനത്ത് അറുപതിന്റെ ആകൃതിയിലായിരുന്നു മതില് തീര്ത്തത്. സംഖ്യാകൃതിയും കടന്ന് സ്നേഹമതില് സ്കൂള് കവാടത്തിലേക്ക് നീണ്ടു. വദ്യാര്ത്ഥികള്, ജനപ്രതിനിധികള്, അധ്യാപകര്, സ്കൂള് ജീവനക്കാര്, ബിആര്സി പ്രതിനിധികള്, പൂര്വവിദ്യാര്ത്ഥികള്, ഓട്ടോറിക്ഷാ തൊഴിലാളികള്, രക്ഷിതാക്കള് തുടങ്ങിയവര് മതിലിന്റെ ഭാഗമായി.
ബഷീര് തിരുവനന്തപുരത്ത് ഇരുന്ന് എഴുതിയ നോവലെന്ന പ്രത്യേകതയുള്ളതിനാലാണ് പരിപാടികള് ആസൂത്രണം ചെയ്തത്. ഒരു വര്ഷം നീണ്ടു നില്ക്കുന്ന ആഘോഷപരിപാടികളാണ് സ്കൂള് ആസൂത്രണം ചെയ്തിട്ടുള്ളത്. നോവല് പാരായണം, സാഹിത്യ സദസുകള്, സാഹിത്യ യാത്ര, വിവിധ സ്കൂളുകളെ ഏകോപിപ്പിച്ച് കൊണ്ടുള്ള ബഷീര് ക്വിസ് മത്സരം എന്നിവയും സംഘടിപ്പിക്കുന്നുണ്ട്.
