കൊച്ചി: കേരള പത്രപ്രവര്ത്തക യൂണിയന് നടപ്പാക്കുന്ന ജേര്ണലിസ്റ്റ് വെല്ഫെയര് ഫണ്ടിന് മുഖ്യമന്ത്രി പിണറായി വിജയന് തുടക്കം കുറിച്ചു. എറണാകുളം ടിഡിഎം ഹാളില് ചേര്ന്ന ചടങ്ങില് മാധ്യമപ്രവര്ത്തകര്ക്കുള്ള മെമ്പര്ഷിപ്പ് കാര്ഡ് മുഖ്യമന്ത്രി കൈമാറി. യൂണിയന് സംസ്ഥാനവ്യാപകമായി നടപ്പാക്കുന്ന ലഹരിവിരുദ്ധ കാമ്പയിനായ ബ്രേക്കിങ് ഡി പദ്ധതിയുടെ ഉദ്ഘാടനം പ്രതിപക്ഷ നേതാവ് വി.ഡി. സതീശന് നിര്വഹിച്ചു.
സ്റ്റാര്ട്ട് അപ്പ് സംരംഭമായ സൂപ്പര് എഐയുമായി സഹകരിച്ചു യൂണിയന് നടപ്പാക്കുന്ന പദ്ധതിയാണ് ബ്രേക്കിങ് ഡി പദ്ധതി. സംസ്ഥാന തലത്തില് വിവിധ മാധ്യമ സ്ഥാപനങ്ങളില് നിന്ന് വിരമിച്ചവര്ക്കായി നടത്തിയ സൗഹൃദ സംഗമം മന്ത്രി പി. രാജീവ് ഉദ്ഘാടനം ചെയ്തു. ജന്മഭൂമിയില് നിന്ന് വിരമിച്ച അനില് ജി. നമ്പൂതിരി, ആര്. അജയകുമാര്, സജീവന്. കെ എന്നിവര് ഉപഹാരങ്ങള് ഏറ്റുവാങ്ങി.
യോഗത്തില് കെയുഡബ്ല്യുജെ സംസ്ഥാന പ്രസിഡന്റ് റെജികുമാര് അധ്യക്ഷനായി. ഹൈബി ഈഡന് എംപി, ടി.ജെ. വിനോദ് എംഎല്എ, ജില്ലാ പഞ്ചായത്ത് പ്രസിഡന്റ് മനോജ് മൂത്തേടന്, യൂണിയന് സംസ്ഥാന ജന. സെക്രട്ടറി സുരേഷ് എടപ്പാള്, ജില്ലാ പ്രസിഡന്റ് ഗോപകുമാര്, സെക്രട്ടറി ഷജില്കുമാര് തുടങ്ങിയവര് പങ്കെടുത്തു.
സര്വീസിലിരിക്കെ മരിച്ചാല് പത്ത് ലക്ഷം രൂപയും ജോലിയെടുക്കാന് കഴിയാത്ത വിധം ശാരീരിക വിഷമതയില് ആകുന്നവര്ക്ക് മൂന്നു ലക്ഷം രൂപയും സഹായം എത്തിക്കുന്ന ജേര്ണലിസ്റ്റ് വെല്ഫെയര് ഫണ്ടില് സംസ്ഥാനത്തെ മുഴുവന് മാധ്യമ പ്രവര്ത്തകരെയും ഉള്പ്പെടുത്താനുള്ള ശ്രമങ്ങള് തുടരുകയാണെന്നും യൂണിയന് നേതാക്കള് അറിയിച്ചു.
