ചെന്നൈ: തെരുവ് നായയെ ലക്ഷ്യമിട്ട് വെച്ച വെടിയേറ്റ് സ്കൂൾ വിദ്യാർത്ഥി ഗുരുതരാവസ്ഥയിൽ. തമിഴ്നാട്ടിലെ മധുരാന്തകത്താണ് സംഭവം. വിദ്യാർത്ഥിയുടെ തലയിലാണ് വെടിയേറ്റത്. സംഭവവുമായി ബന്ധപ്പെട്ട് രണ്ടുപേരെ പൊലീസ് അറസ്റ്റ് ചെയ്തു.ഇന്നലെ രാവിലെയാണ് സംഭവം. സ്കൂളിലേക്കു നടന്നു പോകുകയായിരുന്ന കുരളരശൻ എന്ന പതിനൊന്നുകാരനാണ് വെടിയേറ്റത്. ഗുരുതരമായി പരുക്കേറ്റ കുട്ടിയെ ചെങ്കൽപെട്ട് ഗവ. ആശുപത്രിയിൽ പ്രവേശിപ്പിച്ചു. തീവ്ര ചികിത്സാ വിഭാഗത്തിൽ ചികിത്സയിലാണ് കുരളരശൻ.ശരത് കുമാർ എന്നയാളാണ് വെടിയുതിർത്തത്. വിലങ്കാട് സ്വദേശി വെങ്കടേശൻ എന്നയാളാണ് തെരുവ് നായ്ക്കളെ വെടിവെച്ച് കൊല്ലാൻ ഇയാളെ ചുമതലപ്പെടുത്തിയത്. രണ്ടുപേരെയും പൊലീസ് അറസ്റ്റ് ചെയ്തു. വെടിവയ്ക്കാൻ ഉപയോഗിച്ച നാടൻ തോക്കും പൊലീസ് പിടിച്ചെടുത്തു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
