ന്യൂദല്‍ഹി : ഇന്ത്യന്‍ റെയില്‍വേ ട്രെയിന്‍ യാത്രാ നിരക്കുകള്‍ വര്‍ധിപ്പിക്കുന്നു. യാത്രാ നിരക്കുകളില്‍ വരുത്തിയ ചെറിയ വര്‍ധന ജൂലായ് 1 മുതല്‍ പ്രാബല്യത്തില്‍ വരും. 500 കിലോമീറ്ററിന് മുകളില്‍ യാത്രകള്‍ക്ക് കിലോമീറ്ററിന് അര പൈസ കൂടും. നോണ്‍ എസി മെയില്‍, എക്‌സ്പ്രസ് ട്രെയിനുകള്‍ക്ക് കിലോമീറ്ററിന് ഒരു പൈസ വര്‍ദ്ധിക്കും. എസി കോച്ചുകള്‍ക്ക് കിലോമീറ്ററിന് 2 പൈസയാണ് വര്‍ധന.
500 കിലോമീറ്റര്‍ യാത്രയ്ക്ക് സബര്‍ബന്‍ ടിക്കറ്റുകള്‍ക്കും സെക്കന്‍ഡ് ക്ലാസ് യാത്രയ്ക്കും നിരക്ക് വര്‍ദ്ധനയില്ല. പ്രതിമാസ സീസണ്‍ ടിക്കറ്റിലും വര്‍ദ്ധനവില്ല.
നേരത്തെ തത്കാല്‍ ട്രെയിന്‍ ടിക്കറ്റ് ബുക്കിംഗുകള്‍ക്ക് ആധാര്‍ രജിസ്‌ട്രേഷന്‍ നിര്‍ബന്ധമാക്കിയത് ജൂലായ് ഒന്നു മുതല്‍ പ്രാബല്യത്തില്‍ വരും. ഉപഭോക്താക്കള്‍ക്ക് തത്കാല്‍ പദ്ധതിയുടെ ആനുകൂല്യങ്ങള്‍ ലഭിക്കുന്നുണ്ടെന്ന് ഉറപ്പാക്കാന്‍ വേണ്ടിയാണ് പുതിയ നിര്‍ദേശമെന്ന് റെയില്‍വേ മന്ത്രാലയം അറിയിച്ചു.
ഇനി മുതല്‍ ഐആര്‍സിടിസി വഴി ടിക്കറ്റുകള്‍ ബുക്ക് ചെയ്യുമ്പോള്‍ യാത്രക്കാര്‍ക്ക് ആധാര്‍ അടിസ്ഥാനമായ ഒടിപി ലഭിക്കും. ഇത് വഴി ആദ്യ ഘട്ടം പൂര്‍ത്തിയാക്കിയ ശേഷമാകും ടിക്കറ്റ് ബുക്ക് ചെയ്യാന്‍ സാധിക്കുക. ഇന്ത്യന്‍ റെയില്‍വേയുടെ അംഗീകൃത ബുക്കിംഗ് ഏജന്റുമാര്‍ക്കുള്ള തത്കാല്‍ ടിക്കറ്റ് റിസര്‍വേഷനുകള്‍ക്ക് പുതിയ മാര്‍ഗനിര്‍ദ്ദേശങ്ങള്‍ പരിധി ഏര്‍പ്പെടുത്തിയിട്ടുണ്ട്.
പ്രതികരിക്കാൻ ഇവിടെ എഴുതുക