എന്താണ് ഹോർമുസ് കടലിടുക്ക് ? ഇറാൻ ഇത് അടച്ചുപൂട്ടിയാൽ ലോക സമ്പദ്‌വ്യവസ്ഥ ഇളകുമോ ? ആശങ്കയിൽ ലോകം

ടെഹ്റാൻ : ഇസ്രായേൽ-ഇറാൻ യുദ്ധം അപകടകരമായ ഒരു വഴിത്തിരിവിലെത്തിയിരിക്കുകയാണ്. ഞായറാഴ്ച യുഎസ് ബോംബാക്രമണത്തിന് ശേഷം ഇറാൻ ഖൈബർ മിസൈൽ ഉപയോഗിച്ച് ഇസ്രായേലിനെ ആക്രമിച്ചിരുന്നു. പിന്നീട് ഇസ്രായേൽ ഇറാന്റെ ഖോറാംഷഹർ-4 മിസൈൽ ഡിപ്പോ ആക്രമിച്ച് തകർക്കുകയും ചെയ്തു.

അമേരിക്ക കൂടി യുദ്ധത്തിലേക്ക് ചാടിയതോടെ സ്ഥിതി സ്ഫോടനാത്മകമായിയെന്ന് വേണം കരുതുവാൻ. യുഎസ് ആക്രമണത്തിനുള്ള മറുപടിയെന്നോണം ഇറാൻ ഇപ്പോൾ അവരുടെ ഏറ്റവും പ്രധാനപ്പെട്ട എണ്ണ പാതയായ ഹോർമുസ് കടലിടുക്ക് അടയ്‌ക്കാൻ പോകുന്നു. ഇറാൻ പാർലമെന്റ് ഈ സുപ്രധാന തീരുമാനത്തിന് അംഗീകാരം നൽകിയിട്ടുണ്ട്.

ഇറാൻ സ്റ്റേറ്റ് മീഡിയ ഞായറാഴ്ചയാണ് ഈ വിവരം നൽകിയത്. ഇറാന്റെ ഉന്നത സുരക്ഷാ അതോറിറ്റിയായ സുപ്രീം നാഷണൽ സെക്യൂരിറ്റി കൗൺസിൽ ഈ തീരുമാനം അന്തിമമാക്കേണ്ടത് അത്യാവശ്യമാണെന്ന് ഇറാൻ പാർലമെന്റിന്റെ ദേശീയ സുരക്ഷാ കൗൺസിൽ അംഗമായ മേജർ ജനറൽ കൊവാസരി പറഞ്ഞു.

എന്താണ് ഹോർമുസ് കടലിടുക്ക് , എന്തുകൊണ്ട് ഇത്ര പ്രധാന്യമർഹിക്കുന്നു ?

ഇറാനും ഒമാനും ഇടയിലുള്ള ഒരു പ്രധാന ഇടുങ്ങിയ ജലപാതയാണ് ഹോർമുസ് കടലിടുക്ക്. പേർഷ്യൻ ഗൾഫിനെ ഒമാൻ ഉൾക്കടലുമായും അറേബ്യൻ കടലുമായും ബന്ധിപ്പിക്കുന്നു. ലോകത്തിലെ ഏറ്റവും പ്രധാനപ്പെട്ട എണ്ണ ഗതാഗത ചെക്ക് പോയിന്റ് എന്നാണ് യുഎസ് എനർജി ഇൻഫർമേഷൻ അഡ്മിനിസ്ട്രേഷൻ ഇതിനെ വിളിക്കുന്നത്. ആഗോള ലിക്വിഡ് പെട്രോളിയം ഇന്ധന ഉപഭോഗത്തിന്റെയും ആഗോള ദ്രവീകൃത പ്രകൃതിവാതക (എൽഎൻജി) വ്യാപാരത്തിന്റെയും അഞ്ചിലൊന്ന് ഈ കടലിടുക്കിലൂടെയാണ് കടന്നുപോകുന്നത്.

എല്ലാ മാസവും 3000-ത്തിലധികം എണ്ണ, വാതക കപ്പലുകൾ ഈ പാതയിലൂടെ കടന്നുപോകുന്നു. ലോകത്തിലെ മൊത്തം എണ്ണ വിതരണത്തിന്റെ അഞ്ചിലൊന്ന് ഭാഗവും ഈ പാതയിലൂടെയാണ് കടന്നുപോകുന്നത്. അതായത്, ഓരോ അഞ്ച് ലിറ്ററിൽ ഒരു ലിറ്റർ എണ്ണയും ഇവിടെ നിന്നാണ് വിതരണം ചെയ്യുന്നത് എന്ന് സാരം.

ഇറാൻ ഹോർമുസ് കടലിടുക്ക് അടച്ചുപൂട്ടിയാൽ അത് ആഗോള വ്യാപാരത്തെ തടസ്സപ്പെടുത്തുകയും എണ്ണ വില വർദ്ധിപ്പിക്കുകയും ആഗോള സമ്പദ്‌വ്യവസ്ഥയിൽ അസ്ഥിരതയ്‌ക്ക് കാരണമാവുകയും ചെയ്യും. ആഗോള എണ്ണ ഉപഭോഗത്തിന്റെ 20 ശതമാനവും ഹോർമുസ് കടലിടുക്കിലൂടെയാണ് കടന്നുപോകുന്നത്.

ഹോർമുസ് തടഞ്ഞാൽ ഇന്ത്യയെ എങ്ങനെ ബാധിക്കും ?

ലോകത്തിലെ എണ്ണ വിതരണത്തിന്റെ 26% ഈ പാതയിലൂടെയാണ് കടന്നുപോകുന്നത്. ഹോർമുസ് അടച്ചാൽ എണ്ണ ക്ഷാമം ഉണ്ടാകും. അത് അമേരിക്കയുൾപ്പെടെ ലോകത്തെ മുഴുവൻ ബാധിക്കും. ഹോർമുസ് ഇന്ത്യയ്‌ക്കും വളരെ പ്രധാനമാണ്, കാരണം ഈ ജലപാതയിലൂടെയാണ് ദിവസവും വലിയ അളവിൽ എണ്ണ ഇന്ത്യയിലെത്തുന്നത്.

ഇന്ത്യ പ്രതിദിനം 5.5 ദശലക്ഷം ബാരൽ എണ്ണ ഉപയോഗിക്കുന്നു, അതിൽ 1.5 ദശലക്ഷം ബാരൽ എണ്ണ ഈ ജലപാതയിലൂടെയാണ് വരുന്നത്. ലോകത്തിലെ എണ്ണ വ്യാപാരത്തിന്റെ നാലിലൊന്ന് ഭാഗവും ഗൾഫ് രാജ്യങ്ങളെ ഇന്ത്യൻ മഹാസമുദ്രവുമായി ബന്ധിപ്പിക്കുന്ന ഈ ജലപാതയിലൂടെയാണ് കടന്നുപോകുന്നത്.