ഫ്ലോറിഡ : ഇന്ത്യൻ ബഹിരാകാശയാത്രികൻ ശുഭാൻഷു ശുക്ല ആക്സിയം സ്‌പേസിന്റെ ആക്‌സ്-4 ദൗത്യത്തിൽ ബഹിരാകാശത്തേക്ക് പോകാൻ ഒരുങ്ങുകയാണ്. അതേസമയം ദൗത്യ സംഘത്തിനൊപ്പം വിചിത്രമായി കാണപ്പെടുന്ന സൂക്ഷമ ജീവികളായ ടാർഡിഗ്രേഡുകളും ബഹിരാകാശത്തേക്ക് പോകുന്നുവെന്നതാണ് ഏറെ കൗതുകമുണർത്തുന്നത്.
ടാർഡിഗ്രേഡുകളുടെ വലിപ്പം വളരെ ചെറുതായതിനാൽ അവയെ നഗ്നനേത്രങ്ങൾ കൊണ്ട് കാണാൻ കഴിയില്ല. ഈ ജീവി വളരെ ചെറുതാണെങ്കിലും ഇത് അതിജീവനത്തിൽ ചാമ്പ്യനാണെന്ന് വേണം പറയുവാൻ. ടാർഡിഗ്രേഡുകളെ വാട്ടർ ബിയറുകൾ എന്നും വിളിക്കുന്നുണ്ട്. എങ്ങനെയാണ് ടാർഡിഗ്രേഡുകൾ ബഹിരാകാശത്ത് പോലും അതിജീവിക്കാൻ കഴിയുന്നത്ര ശക്തരായി മാറിയത് എന്ന് ഒന്ന് പരിശോധിക്കാം.
ടാർഡിഗ്രേഡുകൾ വളരെ സൂക്ഷ്മ ജലജീവികളാണ്, അവയ്‌ക്ക് 8 കാലുകളുണ്ട്. വലിപ്പം കുറവാണെങ്കിലും മനുഷ്യർക്ക് വളരെക്കാലമായി ടാർഡിഗ്രേഡുകളെക്കുറിച്ച് അറിയാം. 1773 ൽ ജർമ്മൻ പ്രകൃതിശാസ്ത്രജ്ഞനായ ജോഹാൻ ഓഗസ്റ്റ് എഫ്രേം ഗോയ്‌സാണ് ഇത് ആദ്യമായി കണ്ടെത്തിയത്. അവയുടെ വലിപ്പം കുറവാണെങ്കിലും, അവയുടെ ഘടന സങ്കീർണ്ണമാണ്. ശാസ്ത്രജ്ഞർ ഏകദേശം 1,300 ടാർഡിഗ്രേഡ് ഇനങ്ങളെ തിരിച്ചറിഞ്ഞിട്ടുണ്ട്.
ടാർഡിഗ്രേഡുകൾ ജീവനോടെ നിലനിൽക്കും
ഏത് സാഹചര്യത്തിലും സ്വയം ജീവൻ നിലനിർത്താൻ ടാർഡിഗ്രേഡുകൾക്ക് കഴിവുണ്ട്. അത് കടുത്ത ചൂടായാലും തണുപ്പായാലും അവ അതിജീവിക്കും. വെള്ളത്തിന്റെ വളരെ ഉയർന്ന താപനിലയിലും അവയ്‌ക്ക് അതിജീവിക്കാൻ കഴിയും. കൂടാതെ ആയിരക്കണക്കിന് മടങ്ങ് കൂടുതൽ വികിരണത്തെ അവയ്‌ക്ക് അതിജീവിക്കാൻ കഴിയും. ബഹിരാകാശത്ത് പോലും അതിജീവിക്കാൻ കഴിയുന്ന ഒരേയൊരു ജീവികളാണിവ എന്നത് ശ്രദ്ദേയമാണ്.
നോർവേയിലെ ഓസ്ലോ സർവകലാശാലയിലെ നാച്ചുറൽ ഹിസ്റ്ററി മ്യൂസിയത്തിലെ ജെയിംസ് ഫ്ലെമിംഗ് പറയുന്നതനുസരിച്ച് ഒരു ടാർഡിഗ്രേഡിന് ഏതാനും ആഴ്ചകൾ മാത്രമേ സജീവമായ ആയുസ്സുള്ളൂ. എന്നാൽ അതിനിടയിൽ എന്തെങ്കിലും മോശം സാഹചര്യം ഉണ്ടായാൽ അത് സൂപ്പർ-ഹൈബർനേഷൻ അവസ്ഥ എന്ന് വിളിക്കപ്പെടുന്ന ഒരു നിഷ്‌ക്രിയ ഘട്ടത്തിലേക്ക് പോകുന്നു. ഈ അവസ്ഥയിൽ ഇതിന് ഒരു നൂറ്റാണ്ട് പോലും അതിജീവിക്കാൻ കഴിയും. ഇതിനെ ടൺ സ്റ്റേറ്റ് എന്നും വിളിക്കുന്നു.
2007 ൽ യൂറോപ്യൻ ബഹിരാകാശ ഏജൻസി അതിന്റെ ഒരു ദൗത്യത്തിൽ, ഏകദേശം 3,000 ടാർഡിഗ്രേഡുകളെ 10 ദിവസം ബഹിരാകാശത്ത് സൂക്ഷിച്ചു. റിപ്പോർട്ട് അനുസരിച്ച് ടാർഡിഗ്രേഡുകളിൽ മൂന്നിൽ രണ്ട് ഭാഗവും ഈ ദൗത്യത്തെ അതിജീവിക്കുകയും ഭൂമിയിലേക്ക് മടങ്ങുകയും ചെയ്തുവെന്നാണ്.
പ്രതികരിക്കാൻ ഇവിടെ എഴുതുക: