ജയിലിൽ നിന്ന് പുറത്തിറങ്ങിയ ഉടൻ പാകിസ്ഥാന് സിന്ദാബാദ് വിളിച്ച് ആവേശം കാട്ടി : പിന്നാലെ വീണ്ടും അകത്തായി ആബിദ് ഖാൻ

വാരണാസി ; ജയിലിൽ നിന്ന് പുറത്തിറങ്ങിയ ഉടനെ പാകിസ്ഥാന് സിന്ദാബാദ് വിളിച്ച യുവാവ് അകത്തായി . വാരണാസി ജില്ലയിൽ കവർച്ച, ആക്രമണം എന്നീ കുറ്റങ്ങൾ ചുമത്തപ്പെട്ട് ജയിലിലായിരുന്ന ആബിദ് ഖാനാണ് ജയിലിൽ നിന്ന് പുറത്തിറങ്ങിയ ഉടൻ തന്നെ അനുമതിയില്ലാതെ തുറന്ന കാറിൽ പ്രകടനം നടത്തി പാകിസ്ഥാനെ പിന്തുണച്ച് മുദ്രാവാക്യങ്ങൾ മുഴക്കിയത് .

ഘോഷയാത്രയിൽ പങ്കെടുത്ത ആബിദ് ഖാന്റെ അനുയായികളും മുദ്രാവാക്യം വിളിച്ചു. വീഡിയോ സോഷ്യൽ മീഡിയയിൽ വൈറലായതോടെ ആബിദിനെതിരെ കേസെടുത്തു, പിന്നാലെ ആബിദിനെയും രണ്ട് കൂട്ടാളികളും പൊലീസ് പിടികൂടുകയും ചെയ്തു . മറ്റ് പ്രതികൾക്കായി തിരച്ചിൽ തുടരുകയാണ് .

സോഷ്യൽ മീഡിയയിൽ വൈറലാകുന്ന വീഡിയോയിൽ ജയിലിൽ നിന്ന് പുറത്തിറങ്ങിയ ശേഷം ആബിദ് ഖാൻ അനധികൃതമായി പ്രകടനം നടത്തുന്നത് കാണാം. ചേത്ഗഞ്ച് പോലീസ് സ്റ്റേഷനിൽ ആബിദ് ഖാനും അജ്ഞാതരായ ആളുകൾക്കുമെതിരെ കേസ് രജിസ്റ്റർ ചെയ്തിട്ടുണ്ടെന്ന് കാശി സോൺ ഡിസിപി ഗൗരവ് ബൻസാൽ പറഞ്ഞു. ആബിദിന്റെ ഘോഷയാത്ര കാരണം രണ്ട് കിലോമീറ്റർ നീളമുള്ള ഗതാഗതക്കുരുക്കും രൂപപ്പെട്ടു. കാശി വിശ്വനാഥ് ധാമിലേക്കുള്ള റോഡുകളും വളരെ നേരം സ്തംഭിച്ചു.