സ്റ്റാവംഗര്: ലോക ഒന്നാം നമ്പര് താരം മാഗ്നസ് കാള്സനെ തോല്പിച്ച് നോര്വെ ചെസിലെ ഗുകേഷിന്റെ മധുരപ്രതികാരം റുയ് ലോപസിലായിരുന്നു. താന് ലോക ചെസ് ചാമ്പ്യനായത് വെറുതെയല്ലെന്ന് മാഗ്നസ് കാള്സന് കാട്ടിക്കൊടുക്കുന്ന പ്രകടനമായിരുന്നു ഗുകേഷിന്റേത്.
റുയ് ലോപസ് ഓപ്പണിംഗാണ് വെള്ളക്കരുക്കള് ഉപയോഗിച്ച ഗുകേഷ് സ്വീകരിച്ചത്. മനോഹരമായ എന്ഡ് ഗെയിമില് കാള്സനെ വീഴ്ത്തിയ ഗുകേഷിന്റെ മിടുക്ക് കാണാം. 16ാം നൂറ്റാണ്ടിലെ സ്പെയിനില് ജീവിച്ചിരുന്ന പാതിരിയായ റുയ് ലോപസ് എന്ന ചെസ് താരമാണ് ഈ ഓപ്പണിംഗിന്റെ സ്രഷ്ടാവ്.
ഇ4-ഇ5
എന്എഫ്3- എന്സി6
ബിബി5
എന്നിങ്ങനെ പോകുന്നു റുയ് ലോപസ് ഓപ്പണിംഗിലെ ആദ്യ കരുനീക്കങ്ങള്. ചെസ് ബോര്ഡിലെ ഒത്തനടുക്കായുള്ള നാല് കളങ്ങള് കയ്യടക്കുകയും കരുക്കള് വേഗം പുറത്തെടുത്ത് മൂല്യം കൂട്ടുകയും ചെയ്യാനാണ് ഈ ഓപ്പണിംഗ് സ്വീകരിക്കുന്ന വെള്ളക്കരുക്കള് ഉപയോഗിക്കുന്ന കളിക്കാരന് ചെയ്യുക. ബിഷപ്പും (ആന) നൈറ്റും (കുതിര) ഉപയോഗിച്ച് വെള്ളക്കരുക്കള് ഉപയോഗിച്ച് കളിക്കുന്ന ഗുകേഷ് ബോര്ഡിലെ സെന്റര് കളങ്ങള് പിടിക്കാനും തന്ത്രപരമായ ആധിപത്യം നേടാനുമാണ് ശ്രമിക്കുന്നത്.
ചെസില് എന്ഡ് ഗെയിമിന്റെ മനോഹാരിതയാണ് ഇവിടെ ഇതള് വിടരുന്നത്. തോല്ക്കുമായിരുന്ന ഒരു കളി മാഗ്നസ് കാള്സന് വരുത്തിയ പിഴവിനെ മുതലെടുത്ത് ഗുകേഷ് കൈപ്പിടിയിലൊതുക്കുകയായിരുന്നു. എന്തായാലും ലോക ചെസ് ചാമ്പ്യന് പട്ടം നേടാന് ഗുകേഷ് യോഗ്യനല്ലെന്ന മാഗ്നസ് കാള്സന്റെ വീമ്പിളക്കലിന് ഉഗ്രന് തിരിച്ചടിയാണ് ഗുകേഷ് നല്കിയത്.
