ദുബായ്: യുഎഇയ്‌ക്ക് ആകെ അത്ഭുതമാകുകയാണ് 15കാരിയായ റൗദ അല്‍സെര്‍കാല്‍. 14 വയസ്സുള്ളപ്പോഴേ ഗ്രാന്‍റ് മാസ്റ്റര്‍ പദവി നേടിയ പെണ്‍കുട്ടി. യുഎഇയിലെ ആദ്യ ഗ്രാന്‍റ് മാസ്റ്റര്‍ കൂടിയാണ് റൗദ അല്‍സെര്‍കാല്‍.
അമ്മയാണ് നാലാം വയസ്സിലെ റൗദയെ ചെസ്സിലേക്ക് കൊണ്ടുവന്നത്. ഷാര്‍ജ ചെസ് സ്കൂളും മറ്റ് കോച്ചുകളും റൗദയ്‌ക്ക് പിന്തുണയേകി. പഠിപ്പിന് സമാന്തരമായി തന്റെ അഭിനിവേശമായ ചെസ്സും റൗദ കൂടെ കൊണ്ടുനടന്നു. ആറ് വയസ്സുകാരുടെ ചെസില്‍ ഏഷ്യന്‍ കിരീടം നേടിക്കൊണ്ടാണ് റൗദ ലോകത്തെ ഞെട്ടിച്ചത്. എട്ട് വയസ്സുള്ളപ്പോഴേ 20 വയസ്സിന് താഴെയുള്ള യുഎഇ ചാമ്പ്യന്‍ഷിപ്പില്‍ കിരീടം നേടി. 14 വയസ്സില്‍ താഴെയുള്ളവരുടെ ഏഷ്യന്‍ ചാമ്പ്യന്‍ഷിപ്പില്‍ വെങ്കലമെഡല്‍ നേടി.
ഇപ്പോഴിതാ റൗദയ്‌ക്ക് നോര്‍വ്വെ ചെസില്‍ മത്സരിക്കാനും ക്ഷണം ലഭിച്ചിരിക്കുന്നു. ആദ്യ മത്സരത്തില്‍ ഉക്രൈന്റെ പ്ലാറ്റോണ്‍ ഗാല്‍പെറിനുമായി തോറ്റു. എങ്കിലും മുഴുവന്‍ എമിറാറ്റി പെണ്‍കുട്ടികള്‍ക്കും പ്രചോദനമാണ് റൗദ. തടസ്സങ്ങളെ തകര്‍ത്ത് ചെസില്‍ മുന്നേറുന്ന ഈ അത്ഭുതപ്രതിഭയെ പ്രോത്സാഹിപ്പിക്കണമെന്ന് തോന്നിയതിനാലാണ് നോര്‍വെ ചെസില്‍ ഉള്‍പ്പെടുത്തിയതെന്ന് നോര്‍വെ ചെസ് സ്ഥാപകന്‍ ജെല്‍ മാഡ് ലാന്‍റ് പറയുന്നു.
പ്രതികരിക്കാൻ ഇവിടെ എഴുതുക: