ന്യൂദൽഹി: രാജ്യത്ത് കൊവിഡ് കേസുകളുടെ എണ്ണത്തിൽ വർദ്ധന. ആയിരത്തിലേറെ ആക്ടീവ് കേസുകളാണ് റിപ്പോർട്ട് ചെയ്തിരിക്കുന്നത്. കേന്ദ്ര ആരോഗ്യ വകുപ്പ് പങ്കുവെച്ച കണക്കുകള് പ്രകാരം 1009 കേസുകളാണ് ഇന്ന് രാവിലെ എട്ട് മണിവരെ റിപ്പോര്ട്ട് ചെയ്തത്. ഇതിൽ പകുതിയിലേറെ രോഗികളും കേരളത്തിലാണ്. 430 പേർക്കാണ് കേരളത്തിൽ കൊവിഡ് സ്ഥിരീകരിച്ചിരിക്കുന്നത്. കൊവിഡുമായി ബന്ധപ്പെട്ട് രണ്ടു മരണവും കേരളത്തിൽ റിപ്പോർട്ട് ചെയ്തിട്ടുണ്ട്.
മഹാരാഷ്ട്രയില് 209 കേസ് റിപ്പോര്ട്ട് ചെയ്തു. ദല്ഹിയില് 104 കൊവിഡ് രോഗികളാണുള്ളത്. മെയ് 19ന് ശേഷം മാത്രം 99 കേസുകളാണ് ദല്ഹിയില് വര്ധിച്ചത്. ഇതേ കാലയളവില് 24 പേര്ക്ക് രോഗം ഭേദമാകുകയും ചെയ്തിട്ടുണ്ട്. കര്ണാടക- 47, തമിഴ്നാട്- 69, ഗുജറാത്ത്- 83, ഉത്തര് പ്രദേശ്- 15, രാജസ്ഥാന്- 13 എന്നിങ്ങനെയാണ് മറ്റ് സംസ്ഥാനങ്ങളിലെ കൊവിഡ് കണക്കുകള്. രോഗികളെല്ലാം വീടുകളിൽ നിരീക്ഷണത്തിലാണ്.
ഹോങ്കോങ്, സിംഗപ്പൂര് തുടങ്ങിയ രാജ്യങ്ങളിലും കൊവിഡ് വര്ധിക്കുന്നുണ്ട്. എന്നാല് ഭയപ്പെടേണ്ട സാഹചര്യമില്ലെന്നാണ് ആരോഗ്യ വിദഗ്ദര് അറിയിക്കുന്നത്. ഗര്ഭിണികള്, പ്രായമായവര്, വിട്ടുമാറാത്ത രോഗമുള്ളവര് തുടങ്ങിയ വിഭാഗത്തിലുള്ളവര് മുന്കരുതലെടുക്കണം. ആള്ക്കൂട്ടത്തിലിറങ്ങുമ്പോള് മാസ്ക് ധരിക്കണമെന്നും ശുചിത്വം പാലിക്കണമെന്നും അനാവശ്യ യാത്രകള് ഉപേക്ഷിക്കണമെന്നും ആരോഗ്യ വിദഗ്ദര് അറിയിക്കുന്നു.
