ലണ്ടൻ: യുകെയിലെ വെല്ലിംഗ്ബറോ നഗരത്തിന്റെ പുതിയ മേയറായി നിയമിതനായി ഉത്തർപ്രദേശിൽ നിന്നുള്ള രാജ് മിശ്ര. യുപിയിലെ മിർസാപൂരിൽ നിന്നുള്ള ഒരു കർഷകന്റെ മകനാണ് ഇപ്പോൾ യുകെയിലെ പ്രമുഖ നഗരത്തിന്റെ മേയർ എന്നത് ഏത് ഒരു ഇന്ത്യക്കാരനെ സംബന്ധിച്ചിടത്തോളം അഭിമാനം നൽകുന്നതാണ്.
വെല്ലിംഗ്ബറോ യുകെയിലെ ഈസ്റ്റ് മിഡ്‌ലാൻഡ്‌സ് മേഖലയിലാണ് സ്ഥിതി ചെയ്യുന്നത്. ഈ മാസം ആദ്യം അദ്ദേഹം പ്രാദേശിക മുനിസിപ്പൽ കൗൺസിലറായി തിരഞ്ഞെടുക്കപ്പെട്ടു. മെയ് 6 ന് നടന്ന തദ്ദേശ തിരഞ്ഞെടുപ്പിൽ നഗരത്തിലെ വിക്ടോറിയ വാർഡിൽ നിന്ന് തിരഞ്ഞെടുക്കപ്പെട്ട രാജ് മിശ്ര ചൊവ്വാഴ്ച നടന്ന സിറ്റി കൗൺസിലിന്റെ വാർഷിക യോഗത്തിൽ വെല്ലിംഗ്ബറോയുടെ അഞ്ചാമത്തെ മേയറായി തിരഞ്ഞെടുക്കപ്പെടുകയായിരുന്നു.
രാജ് മിശ്ര ആറ് വർഷം മുമ്പ് എംടെക് പഠിക്കാനാണ് ലണ്ടനിലേക്ക് പോയത്. അവിടെ അദ്ദേഹം പഠനം പൂർത്തിയാക്കുക മാത്രമല്ല, രാഷ്ട്രീയത്തിലും വ്യക്തിമുദ്ര പതിപ്പിച്ചു. തുടർന്ന് അദ്ദേഹം വെല്ലിംഗ്ബറോ നഗരത്തിന്റെ പുതിയ മേയറായി തിരഞ്ഞെടുക്കപ്പെടുകയായിരുന്നു.
“വെല്ലിംഗ്ബറോയുടെ മേയറായി സേവനമനുഷ്ഠിക്കാൻ കഴിയുന്നത് ഒരു ബഹുമതിയാണ്. ഊർജ്ജസ്വലവും, എല്ലാവരെയും ഉൾക്കൊള്ളുന്നതും, സമൃദ്ധവുമായ ഒരു സമൂഹം സൃഷ്ടിക്കാൻ എല്ലാ നിവാസികളുമായും പ്രവർത്തിക്കാൻ ഞാൻ പ്രതിജ്ഞാബദ്ധനാണ്. ഒരുമിച്ച്, നമ്മുടെ നഗരത്തിന് ശോഭനമായ ഒരു ഭാവി കെട്ടിപ്പടുക്കാം,” – മിശ്ര പ്രസ്താവനയിൽ പറഞ്ഞു.
അതേ സമയം മിർസാപൂരിൽ സന്തോഷത്തിന്റെ അലയൊലികൾ കാണാനാകും. രാജ് മേയറായി തിരഞ്ഞെടുക്കപ്പെട്ട വാർത്ത മിർസാപൂരിലെ അദ്ദേഹത്തിന്റെ സുഹൃത്തുക്കൾക്കും കുടുംബാംഗങ്ങൾക്കും ഇടയിൽ സന്തോഷത്തിന്റെ ഒരു തരംഗം തന്നെ സൃഷ്ടിച്ചു. ഉത്തർപ്രദേശിലെ മിർസാപൂർ ജില്ലയിലെ ഭട്ടേവ്ര ഗ്രാമവാസിയാണ് രാജ് മിശ്ര.
അച്ഛൻ മുന്ന ലാൽ മിശ്ര ഒരു കർഷകനാണ്. 9 സഹോദരീസഹോദരന്മാരിൽ ആറാമനാണ് രാജ്. രാജ് പ്രതാപ്ഗഢ് സ്വദേശിനിയായ അഭിഷേക മിശ്രയെ വിവാഹം കഴിച്ചു. ഭാര്യ ഒരു എഞ്ചിനീയറാണ്. അവർക്ക് 2 കുട്ടികളുമുണ്ട്.
പ്രതികരിക്കാൻ ഇവിടെ എഴുതുക