പത്തനംതിട്ട:കോന്നിയില് കൈതച്ചക്ക കൃഷിയിടത്തിന് സമീപം കാട്ടാന ചെരിഞ്ഞ സംഭവത്തില് വനം വിജിലന്സ് വിഭാഗം വിശദ അന്വേഷണം നടത്തുമെന്ന് മന്ത്രി എ.കെ.ശശീന്ദ്രന്. കോന്നി ഡിവിഷനിലെ നടുവത്തുമുഴി റെയ്ഞ്ചിന് കീഴില്പാടം സ്റ്റേഷന്റെ പരിധിയിലെ കൈതച്ചക്ക കൃഷിയിടത്തിന് സമീപമാണ് ആനയെ അസ്വാഭാവിക രീതിയില് ചരിഞ്ഞ നിലയില് കണ്ടെത്തിയത്.
സൗരോര്ജ്ജ വേലിയില് നിന്നും ഷോക്കേറ്റാണ് കാട്ടാന ചെരിഞ്ഞത് എന്നാണ് പ്രാഥമിക വിലയിരുത്തല്. എന്നാല് യഥാര്ഥ കാരണം പോസ്റ്റ്മോര്ട്ടം റിപ്പോര്ട്ടിലൂടെയേ വ്യക്തമാകൂ.
സംഭവം കണ്ടെത്തുന്നതിലും റിപ്പോര്ട്ട് ചെയ്യുന്നതിലും കാലതാമസം നേരിട്ടതായി ബോധ്യപ്പെട്ടതിനാല് ഉദ്യോഗസ്ഥരുടെ ഭാഗത്ത് നിന്നും മനപൂര്വ്വമായ വീഴ്ച ഉണ്ടായിട്ടുണ്ടോ എന്ന് വിജലന്സ് വിഭാഗം പരിശോധിക്കും. ഈ സംഭവത്തില് ചീഫ് വൈല്ഡ് ലൈഫ് വാര്ഡന് ലഭിച്ച പരാതിയിലെ ആരോപണങ്ങള് കൂടി പരിഗണിച്ചാണ് വിജിലന്സ് വിഭാഗം സമഗ്രമായ അന്വേഷണം നടത്താന് തീരുമാനിച്ചത്.
