നരേന്ദ്ര മോദിയുടെ നേതൃത്വത്തിൽ ഒരു ഭീകര സംഭവത്തിനും ഉത്തരം നൽകാതെ ഇന്ത്യ വിട്ടിട്ടില്ല : ഇന്ത്യൻ സൈന്യത്തിനൊപ്പമെന്ന് മുകേഷ് അംബാനി

മുംബൈ : ഇന്ത്യൻ സായുധ സേന നടത്തിയ ഓപ്പറേഷൻ സിന്ദൂരിനെ പ്രശംസിച്ച് റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി . ഭീകരതയ്‌ക്കെതിരെ ഇന്ത്യ മുഴുവൻ ഒറ്റക്കെട്ടായി നിലകൊള്ളുന്നുവെന്നും പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ ഒരു ഭീകര സംഭവത്തിനും ഉത്തരം ലഭിക്കാതെ അവശേഷിക്കില്ലെന്ന് രാജ്യം തെളിയിച്ചിട്ടുണ്ടെന്നും അദ്ദേഹം പറഞ്ഞു.

‘ ഇന്ത്യ സമാധാനമാണ് ആഗ്രഹിക്കുന്നത് . എന്നാൽ രാജ്യത്തിന്റെ സുരക്ഷ, അന്തസ്സ്, പരമാധികാരം എന്നിവയിൽ വിട്ടുവീഴ്ച ചെയ്യില്ല. നമ്മുടെ സായുധ സേന എല്ലാ പ്രകോപനങ്ങൾക്കും കൃത്യവും ശക്തവുമായ മറുപടി നൽകിയിട്ടുണ്ട്. ഇത് പുതിയ ഇന്ത്യയുടെ പുതിയ ചിന്താഗതിയെ കാണിക്കുന്നു .

രാജ്യത്തിന്റെ ഐക്യവും അഖണ്ഡതയും സംരക്ഷിക്കുന്നതിന് സാധ്യമായ എല്ലാ പിന്തുണയും നൽകാൻ തന്റെ കമ്പനിയും മുഴുവൻ റിലയൻസ് കുടുംബവും തയ്യാറാണ്. നമ്മൾ ഒരുമിച്ച് നിൽക്കും, പോരാടും, തീർച്ചയായും നമ്മൾ വിജയിക്കും. ‘ അദ്ദേഹം കുറിച്ചു . “ജയ് ഹിന്ദ്! ജയ് ഹിന്ദ് കി സേന!” എന്ന മുദ്രാവാക്യത്തോടെയാണ് കുറിപ്പ് അവസാനിപ്പിച്ചത്.