ന്യൂദൽഹി : റെയിൽവേ സുരക്ഷയുടെ കാര്യത്തിൽ രാജ്യത്തെ ആളുകൾ അൽപ്പം അലസത പലപ്പോഴും പ്രകടിപ്പിക്കാറുണ്ട്. പോസ്റ്ററുകളിലെ നിയമങ്ങളും ചട്ടങ്ങളും വായിച്ചുകഴിഞ്ഞാലും അവർ അത് മറക്കുകയും പഴയ തെറ്റ് വീണ്ടും വീണ്ടും ആവർത്തിക്കുകയും ചെയ്യുന്നു. ഇത്തരമൊരു സാഹചര്യത്തിൽ ജനങ്ങളുടെ സുരക്ഷയ്ക്കായി റെയിൽവേ ഇപ്പോൾ പുതിയ പരീക്ഷണവുമായി എത്തിയിരിക്കുകയാണ്.
റെയിൽവേ സുരക്ഷയെക്കുറിച്ച് ലളിതമായ ഭാഷയിലും ക്രിയാത്മകമായ രീതിയിലും ജനങ്ങളെ പഠിപ്പിക്കാനാണ് വെസ്റ്റേൺ റെയിൽവേ ഇപ്പോൾ തീരുമാനിച്ചിരിക്കുന്നത്. ഇതിനായി റെയിൽവേ ‘ഛോട്ടാ ഭീമിന്റെ’ സഹായം തേടും. വർഷങ്ങളായി കുട്ടികൾക്കിടയിൽ പ്രശസ്തമായ ഒരു ആനിമേറ്റഡ് കഥാപാത്രമാണ് ഛോട്ടാ ഭീം, കുട്ടികൾക്ക് വളരെ പ്രിയപ്പെട്ട ആളാണ് അദ്ദേഹം. ഇത്തരമൊരു സാഹചര്യത്തിൽ, റെയിൽവേയും കുട്ടികൾക്ക് സുരക്ഷാ നിയമങ്ങൾ പറഞ്ഞുകൊടുക്കാൻ ആഗ്രഹിക്കുന്നുവെന്ന് വേണം മനസിലാക്കാൻ.
ഛോട്ടാ ഭീമിന്റെ സ്രഷ്ടാവും വെസ്റ്റേൺ റെയിൽവേയും കുട്ടികളെയും പൗരന്മാരെയും ബോധവൽക്കരിക്കുന്നതിനായി ഇതിനോടകം സഹകരിച്ചു കഴിഞ്ഞു. മുംബൈയിലെ ജിയോ വേൾഡ് സെന്ററിൽ വെച്ച് വെസ്റ്റേൺ റെയിൽവേയുടെ ചീഫ് പബ്ലിക് റിലേഷൻസ് ഓഫീസർ വിനീത് അഭിഷേകും ഛോട്ടാ ഭീമിന്റെ സ്രഷ്ടാവ് രാജീവ് ചിലകലപുടിയും പരസ്പരം ധാരണപത്രത്തിൽ ഒപ്പിട്ടു കഴിഞ്ഞിട്ടുണ്ട്.
പ്രിന്റ്, ഡിജിറ്റൽ, ടെലിവിഷൻ, റേഡിയോ, പോസ്റ്ററുകൾ എന്നിവയുൾപ്പെടെ വിവിധ മാധ്യമ ഫോർമാറ്റുകളിലും ഒരു വർഷത്തേക്ക് സ്കൂൾ പരിപാടികളിലും ഛോട്ടാ ഭീമിന്റെയും കുടുംബത്തിന്റെയും കഥാപാത്രങ്ങൾ ഉപയോഗിക്കുമെന്ന് റെയിൽവേ അറിയിച്ചു. റെയിൽവേ സുരക്ഷയെയും ഉത്തരവാദിത്ത പെരുമാറ്റത്തെയും കുറിച്ചുള്ള സന്ദേശങ്ങൾ ഫലപ്രദമായി ആശയവിനിമയം നടത്തുന്നതിന് ഛോട്ടാ ഭീം ഫ്രാഞ്ചൈസിയുടെ വ്യാപകമായ ആകർഷണം പ്രയോജനപ്പെടുത്തുക എന്നതാണ് ഈ തന്ത്രപരമായ സഹകരണത്തിന്റെ ലക്ഷ്യമെന്നും ചീഫ് പബ്ലിക് റിലേഷൻസ് ഓഫീസർ പറഞ്ഞു.
രാജ്യത്ത് ഛോട്ടാ ഭീമിന്റെ ജനപ്രീതി കുട്ടികളിൽ നല്ല സ്വാധീനം ചെലുത്തുന്നു, അതിനാൽ കുട്ടികളെ പോസിറ്റീവായി സ്വാധീനിക്കാൻ ഇതിന് കഴിവുണ്ടെന്ന് റെയിൽവേ വിശ്വസിക്കുന്നുവെന്നും അദ്ദേഹം കൂട്ടിച്ചേർത്തു.
