തിരുവനന്തപുരം: സ്പെയ്സ് മെഡിസിന് സഹകരണത്തിനായി ഐഎസ്ആര്ഒയും ശ്രീചിത്ര തിരുനാള് ഇന്സ്റ്റിറ്റിയൂട്ട് ഫോര് മെഡിക്കല് സയന്സസ് ആന്ഡ് ടെക്നോളജിയും (എസ്സിടിഐഎംഎസ്ടി) ധാരണാപത്രത്തില് ഒപ്പുവച്ചു. ശ്രീചിത്രയില് നടന്ന ചടങ്ങില് ഡയറക്ടര് ഡോ. സഞ്ജയ് ബിഹാരിയും ഐഎസ്ആര്ഒ സയന്റിഫിക് സെക്രട്ടറി ഗണേഷ്പിള്ളയുമാണ് ധാരണാപത്രത്തില് ഒപ്പുവച്ചത്. ഈ സഹകരണം സ്പെയ്സ് മെഡിസിന് രംഗത്ത് രാജ്യത്തിന്റെ മുന്നേറ്റത്തില് നാഴികക്കല്ലാകും.
ബഹിരാകാശത്തെ സാഹചര്യങ്ങളില് ഹ്യൂമന് റിസര്ച്ച് മേഖലയില് രാജ്യത്തിന്റെ ശേഷി മെച്ചപ്പെടുത്താന് ഗഗന്യാന് ലക്ഷ്യമിടുന്നതായി ഐഎസ്ആര്ഒ ചെയര്മാന് ഡോ. വി. നാരായണന് പറഞ്ഞു.
ക്ലീന് റൂം, മൈക്രോഗ്രാവിറ്റി ലാബുകള് എന്നിവ വികസിപ്പിക്കുന്നതിലും സ്പെയ്സ് മെഡിസിന് രംഗത്തും ഫലപ്രദമായ സഹകരണമാണ് ഐഎസ്ആര്ഒയുമായി പ്രതീക്ഷിക്കുന്നതെന്ന് ശ്രീചിത്ര ഡയറക്ടര് ഡോ. സഞ്ജയ് ബിഹാരി പറഞ്ഞു.
ഡോ. ക്രിസ് ഗോപാലകൃഷ്ണന്, കേന്ദ്ര ശാസ്ത്ര സാങ്കേതിക വകുപ്പ് അഡീ. സെക്രട്ടറിയും എഐ വിഭാഗം മേധാവിയുമായ ഡോ. സുനില് കുമാര്, വിഎസ്എസ്സി ഡയറക്ടര് ഡോ. ഉണ്ണികൃഷ്ണന് നായര്, എല്പിഎസ്സി ഡയറക്ടര് ഡോ. മോഹന്, എച്ച്എസ്എഫ്സി ഡയറക്ടര് ഡോ. ദിനേശ്കുമാര് സിംഗ്, തിരുവനന്തപുരം ഐഐഎസ്ടി ഡയറക്ടര് ഡോ. ദീപാങ്കര് ബാനര്ജി, ബംഗളൂരു ഐഎസ്ആര്ഒ ആസ്ഥാനത്തെ ഹ്യൂമന് സ്പെയ്സ് പ്രോഗ്രാം ഡയറക്ടര് ഹനമന്ത് റായ് ബലുറഗി എന്നിവര് സംബന്ധിച്ചു.
