കൊച്ചി: കേന്ദ്രസര്ക്കാരിന്റെ നാല് മന്ത്രാലയങ്ങളുടെയും 20 വിദേശ എംബസികളുടെയും പങ്കാളിത്തത്തോടെ നാഷണല് ഇന്ഡസ്ട്രീസ് ഡെവലപ്മെന്റ് കൗണ്സില് കമ്മിറ്റി (എന്ഐഡിസിസി) സംഘടിപ്പിക്കുന്ന ഇന്ത്യന് ഇന്ഡസ്ട്രീസ് ഡെവലപ്മെന്റ് എക്സിബിഷന് ‘ഇന്ഡെക്സ് 2025’ അങ്കമാലി അഡ്ലക്സ് ഇന്റര്നാഷണല് കണ്വെന്ഷന് സെന്ററില് മെയ് 2 മുതല് അഞ്ച് വരെ നടക്കും.
എക്സിബിഷനില് കേന്ദ്രമന്ത്രിമാരായ ജിതിന് റാം മാഞ്ചി, രാജീവ് രഞ്ചന് സിങ്, ചിരാഗ് പാസ്വന്, ബി.എല്. വര്മ്മ, സുരേഷ് ഗോപി, സംസ്ഥാന വ്യവസായ വകുപ്പ് മന്ത്രി പി. രാജീവ്, ബെന്നി ബഹനാന് എംപി, റോജി എം. ജോണ് എംഎല്എ, മുന് കേന്ദ്രമന്ത്രി രാജീവ് ചന്ദ്രശേഖര്, അങ്കമാലി മുനിസിപ്പല് ചെയര്മാന് ഷിയോ പോള് തുടങ്ങിയവര് പങ്കെടുക്കുമെന്ന് എന്ഐഡിസിസി ദേശീയ വൈസ് ചെയര്പേഴ്സണ് ഗൗരി വത്സ വാര്ത്താസമ്മേളനത്തില് പറഞ്ഞു.
ഇവര്ക്കുപുറമെ വിവിധ മന്ത്രാലയങ്ങളുടെ ജോ. സെക്രട്ടറിമാര്, വിവിധ രാജ്യങ്ങളിലെ എംബസി പ്രതിനിധികള്, ലുലു ഗ്രൂപ്പ് ചെയര്മാന് എം.എ. യുസഫലി, ഡോ. ബി.യു. അബ്ദുള്ള തുടങ്ങിയവരും പങ്കെടുക്കും. മിനിസ്ട്രി ഓഫ് മൈക്രോ സ്മോള് ആന്ഡ് മീഡിയം എന്റര്പ്രൈസസ് (എംഎസ്എംഇ), മിനിസ്ട്രി ഓഫ് ഫുഡ് പ്രൊസസിങ് ഇന്ഡസ്ട്രി (എംഒഎഫ്പിഐ), വാണിജ്യ മന്ത്രാലയം, മിനിസ്ട്രി ഓഫ് ഫിഷറീസ്, ആനിമല് ഹസ്ബന്ട്രി ആന്ഡ് ഡയറിങ് എന്നീ മന്ത്രാലയങ്ങളാണ് എക്സിബിഷനില് പങ്കെടുക്കുന്നത്.
രാജ്യത്തെ വ്യവസായ പുരോഗതിക്കായി നൂതന സാങ്കേതിക വിദ്യയോടെ രൂപീകരിച്ച ഇന്ഡ് ആപ്പിന്റെ ലോഞ്ചും ലിസ്റ്റിങ്ങും എക്സിബിഷനില് നടക്കും. ദിവസവും മന്ത്രാലയത്തിന്റെ വിവിധ പദ്ധതികളെക്കുറിച്ച് സെമിനാര് നടക്കും.
വിവിധ കേന്ദ്രപദ്ധതികള്, സബ്സിഡികള്, ഗ്രാന്റുകള് എന്നിവയെക്കുറിച്ച് പൊതുജനങ്ങള്ക്ക് അറിവുപകരുകയാണ് എക്സിബിഷനിലൂടെ ലക്ഷ്യമിടുന്നത്. സംരഭകരംഗത്തേക്ക് കടന്നുവരാന് ആഗ്രഹിക്കുന്നവരും നിലവില് സംരംഭകരായിട്ടുള്ളവരും വിദ്യാര്ത്ഥികളും എക്സിബിഷനില് പങ്കെടുക്കണമെന്നും ഗൗരി വത്സ പറഞ്ഞു. ഐസിഎല് ഫിന്കോര്പാണ് ലെന്റിങ് പാര്ടണര്. ഇതു സംബന്ധിച്ച ധാരാണാപത്രം എന്ഐഡിസിസി ദേശീയ വൈസ് ചെയര്പേഴ്സണ് ഗൗരി വത്സയും ഐസിഎല് ഫിന്കോര്പ്പ് സിഎംഡി അഡ്വ. കെ.ജി. അനില്കുമാറും കൈമാറി. നാല് ദിവസങ്ങളിലായി നടക്കുന്ന എക്സിബിഷനില് 450 ലധികം സ്റ്റാളുകള് ഉണ്ടാകും. കേരളത്തില് ആദ്യമായാണ് എക്സിബിഷന് നടത്തുന്നതെന്നും സംഘാടകര് അറിയിച്ചു.
വാര്ത്താസമ്മേളനത്തില് സതേണ് റീജണല് ചെയര്മാന് വെമ്പള്ളി അമാനുള്ള, അഡ്വ. കെ.ജി. അനില്കുമാര്, എക്സി. ഡയറക്ടര് രാജശ്രീ അജിത്, ഇന്ഡസ്ട്രിയല് ഡെവലപ്മെന്റ് കമ്മിഷണര് ഹരീഷ് ബാലകൃഷ്ണന് നായര് എന്നിവര് പങ്കെടുത്തു.
