വയനാട് : മുണ്ടക്കൈ ചൂരല്മല ഉരുള്പൊട്ടല് ദുരന്തത്തിനിരയായവരുടെ പുനരധിവാസത്തിനായി എല്സ്റ്റണ് എസ്റ്റേറ്റ് ഭൂമി സര്ക്കാര് ഔദ്യോഗികമായി ഏറ്റെടുത്തു. ജില്ലാ കളക്ടര് ഡോ. മേഘശ്രീ എസ്റ്റേറ്റ് ഭൂമിയില് നോട്ടീസ് പതിച്ചു.
ശനിയാഴ്ച മുതല് നിര്മ്മാണ പ്രവര്ത്തനങ്ങള് തുടങ്ങുമെന്ന് കളക്ടര് അറിയിച്ചു.കോടതി ആവശ്യപ്പെട്ട 17 കോടി രൂപ ട്രഷറി വഴി അടച്ചെന്ന് റവന്യൂ മന്ത്രി കെ രാജന് പറഞ്ഞു.
കോടതിയിലേക്ക് പണം ഒടുക്കുന്ന നടപടി വെളളിയാഴ്ച തന്നെ ട്രഷറി അക്കൗണ്ടിലൂടെ ജില്ലാ കളക്ടര് നിര്വഹിച്ചു. കോടതിയിലേക്ക് കൊടുക്കേണ്ട പണം ട്രഷറിയിലേക്ക് ചെക്ക് മുഖാന്തിരം കൈമാറി.
എല്സ്റ്റണ് എസ്റ്റേറ്റിന് 17 കോടി രൂപ കൂടി അധികം നല്കണമെന്ന് ഹൈക്കോടതി ചീഫ് ജസ്റ്റിസിന്റെ നേതൃത്വത്തിലുളള ഡിവിഷന് ബെഞ്ചാണ് ഇടക്കാല ഉത്തരവിട്ടത്.ഏറ്റെടുത്ത ഭൂമിക്ക് 26 കോടി രൂപ നല്കാനായിരുന്നു സംസ്ഥാന സര്ക്കാര് തീരുമാനം.
എന്നാല് ഇതില് ആക്ഷേപം ഉന്നയിച്ച് എല്സ്റ്റണ് എസ്റ്റേറ്റ് സമര്പ്പിച്ച ഹര്ജിയിലാണ് ഹൈക്കോടതിയുടെ ഇടക്കാല ഉത്തരവ്.
