ലോകത്ത് ഏറെ ജനപ്രിയമായി സനാതനധർമ്മം ; ഹിന്ദുമതത്തിന് വീര്യം പകർന്ന് മഹാകുംഭമേള ; ഇന്ത്യയുടെ മാനേജ്മെന്റ് കഴിവിന്റെ തെളിവ് : വാഴ്‌ത്തി വിദേശികൾ

പ്രയാഗ്രാജ് : പന്ത്രണ്ട് വര്‍ഷത്തിലൊരിക്കല്‍ നടക്കുന്ന മഹാകുംഭമേളയ്‌ക്ക് സമാപനം ആയിരിക്കുകയാണ്. കോടിക്കണക്കിന് ഭക്തര്‍ അനുഷ്ഠാനങ്ങളില്‍ പങ്കുചേരാന്‍ എത്തിയിരുന്നു.

ഹിമാലയത്തില്‍ നിന്നുള്ള സന്യാസിമാരും കഠിനതപസ്സനുഷ്ഠിച്ചിരുന്നവരും അഘോരികളും സാധാരണ ഭക്തരുമെല്ലാം ഗംഗയുടെ തീരത്തെത്തി. വേദങ്ങളിലെയും പുരാണങ്ങളിലെയും ഐതിഹ്യങ്ങളിൽ ഊന്നിയുള്ള വിശ്വാസങ്ങളാണ് കുംഭമേളയ്‌ക്ക് അടിസ്ഥാനം. കുംഭമേളയുടെ തുടക്കത്തെ കുറിച്ച് ഭിന്നാഭിപ്രായങ്ങളുണ്ടെങ്കിലും ലോകത്ത് ഏറ്റവുമധികം ഭക്തര്‍ ഒന്നിച്ചുകൂടുന്ന മഹോല്‍സവമാണ് മഹാകുംഭമേള എന്നതിൽ തർക്കമില്ല.

ഇപ്പോഴിതാ വിദേശികളും , വിദേശ മാദ്ധ്യമങ്ങളും ഒന്നടങ്കം പുകഴ്‌ത്തുകയാണ് ഇന്ത്യയുടെ ഈ മഹാ മേളയെ.45 ദിവസങ്ങളിലായി 66 കോടി ആളുകൾ പുണ്യസ്നാനം നടത്തിയെന്നത് മഹാകുംഭത്തിന്റെ മഹത്തായ വിജയത്തെയാണ് കാണിക്കുന്നത് . പ്രധാനമന്ത്രി നരേന്ദ്ര മോദി ഈ പരിപാടിയെ “ഏക്ത കാ മഹാകുംഭ്” എന്നാണ് വിശേഷിപ്പിച്ചത്.

‘ ഇത്രയും വലിയൊരു സമ്മേളനം വൻതോതിൽ സംഘടിപ്പിച്ചത് ശരിക്കും ധീരമായിരുന്നു, യോഗി ആദിത്യനാഥ് മികച്ച പ്രകടനം കാഴ്ചവച്ചു. ഈ വിജയത്തെ മാന്ത്രികമെന്ന് വിശേഷിപ്പിക്കാം. ‘ – എന്നാണ് റഷ്യയിൽ നിന്നുള്ള 12 അംഗ സംഘം പറയുന്നത്.

കോടിക്കണക്കിന് ഭക്തർ ഒരു സ്ഥലത്ത് ഒത്തുകൂടുമ്പോൾ വലിയ അപകടസാധ്യതകളുണ്ട്. എന്തും സംഭവിക്കാമായിരുന്നു. കോടിക്കണക്കിന് ആളുകൾ പുണ്യസ്നാനം ചെയ്യുമ്പോൾ, പകർച്ചവ്യാധി പൊട്ടിപ്പുറപ്പെടുകയോ വലിയ അനിഷ്ട സംഭവങ്ങൾ സംഭവിക്കുകയോ ചെയ്യാമായിരുന്നു. എന്നാൽ അതിനെയൊക്കെ മറികടക്കാനായി.

ഈ മഹാ കുംഭമേള സംഘടിപ്പിക്കുന്നതിലൂടെ, 66 കോടി ജനങ്ങളെയും ചിട്ടയായ രീതിയിൽ കൈകാര്യം ചെയ്യാൻ കഴിയുമെന്ന് ലോകത്തിന് കാണിച്ചുകൊടുത്തു . ശക്തമായ ദൃഢനിശ്ചയവും ആധുനിക സാങ്കേതികവിദ്യയുടെ സഹായവും അതിനു കൂട്ടായി.

ആളുകൾ സഹകരിച്ചാൽ ലക്ഷക്കണക്കിന് ഭക്തർക്ക് ഭക്ഷണവും വെള്ളവും നൽകാൻ കഴിയുമെന്നും തെളിയിക്കപ്പെട്ടിട്ടുണ്ട്. സാധാരണയായി ആളുകൾക്ക് പോലീസുകാരെ ഭയമാണ്, പക്ഷേ ഇവിടെ പോലീസുകാർ സൗഹൃദപരമായി പെരുമാറിയത് വഴി പലരുടെയും മനസിൽ കയറി പറ്റി.

ക്രമീകരണങ്ങൾക്കായി 7,500 കോടി രൂപ ചെലവഴിച്ച് 3 ലക്ഷം കോടി രൂപയുടെ നേട്ടമുണ്ടാക്കിയത് ബിസിനസ്സ് മിടുക്കിന്റെ അടയാളമാണ്. തെറ്റായ കിംവദന്തികൾക്കിടയിലും, ശരിയായ മാനേജ്മെന്റിലൂടെ ജനങ്ങളുടെ വിശ്വാസം നേടി. അതിനാൽ ഈ മഹാ കുംഭമേള സങ്കൽപ്പിക്കാനാവാത്ത ഒരു അനുഭവമായി ഓർമ്മിക്കപ്പെടും.

ഇതു വഴി സനാതന ധർമ്മം ലോകമെമ്പാടും ബഹുമാനം നേടിയെന്നാണ് വിദേശ മാദ്ധ്യമങ്ങൾ പറയുന്നത് . ഇന്ത്യ മാനേജ്മെന്റ് കഴിവുകൾ, കാര്യക്ഷമത, കഴിവ് എന്നിവ എങ്ങനെ ഉപയോഗിച്ചുവെന്ന് ലോകം മുഴുവൻ ശ്രദ്ധിച്ചുവരികയാണ്. അസാധ്യമായത് നേടിയെടുക്കാൻ കഴിയുമെന്ന് ഇന്ത്യ തെളിയിച്ചിട്ടുണ്ടെന്ന് ലോകം അംഗീകരിച്ചു. ഈ അഭൂതപൂർവമായ വിജയം വരും വർഷങ്ങളിൽ പ്രതിധ്വനിക്കും. ഇന്ത്യയുടെ സനാതന ധർമ്മത്തിന്റെ ഏറ്റവും വലിയ നേട്ടമാണിത്.