പത്തനംതിട്ട: നൂറ്റിപ്പതിമൂന്നാമത് അയിരൂര് ചെറുകോല്പുഴ ഹിന്ദുമത പരിഷത്തില് ആര്എസ്എസ് സര്സംഘചാലക് ഡോ. മോഹന് ഭാഗവത് ഇന്നു പങ്കെടുക്കും. വൈകിട്ടു നാലിനു ഹിന്ദു ഏകതാ സമ്മേളനം സര്സംഘചാലക് ഉദ്ഘാടനം ചെയ്യും. ചടങ്ങില് ഒരു ലക്ഷത്തിലധികം പേരെത്തുമെന്നാണ് സംഘാടകരുടെ വിലയിരുത്തല്.
കേരളത്തിലെ 158 ഹൈന്ദവ സംഘടനകളുടെ പ്രതിനിധികളും സംന്യാസി ശ്രേഷ്ഠരും സമ്മേളന ഭാഗമാകും. സുരക്ഷാച്ചുമതലകള് എസ്പിജി ഉദ്യോഗസ്ഥരുടെ നേരിട്ടുള്ള മേല്നോട്ടത്തിലാണ്. ഏകോപനവും മുന്നൊരുക്കങ്ങളും പൂര്ത്തിയായി. 3.20നു റോഡ് മാര്ഗമാണ് സര്സംഘചാലക് ചെറുകോല്പുഴയിലെത്തുക. വാദ്യമേളങ്ങളുടെയും വഞ്ചിപ്പാട്ടിന്റെയും അകമ്പടിയില് അദ്ദേഹത്തെ സ്വീകരിച്ചാനയിക്കും.
ഹിന്ദുമത മഹാമണ്ഡലം പ്രസിഡന്റ് പി.എസ്. നായര് അധ്യക്ഷനാകും. ഉപാധ്യക്ഷന് അഡ്വ. കെ. ഹരിദാസ്, സെക്രട്ടറി അഡ്വ. രാജഗോപാല് എന്നിവര് പ്രസംഗിക്കും. സനാതന ധര്മാചരണത്തില് ശ്രീനാരായണ ഗുരുദേവന്റെ ദര്ശനം അടയാളപ്പെടുത്തുന്ന ‘ശ്രീനാരായണ സ്മൃതി’യുടെ ശതാബ്ദിപ്പതിപ്പും സര്സംഘചാലക് പ്രകാശനം ചെയ്യും. ശിവഗിരി മഠാധിപതി സ്വാമി സച്ചിദാനന്ദയാണ് പതിപ്പിന് അവതാരിക എഴുതിയത്. വൈകിട്ടു സ്വാമി സച്ചിദാനന്ദ ആദ്ധ്യാത്മിക പ്രഭാഷണം നടത്തും.
