കൊച്ചി: നാലുമാസത്തെ പഠനകാലാവധി നിശ്ചയിച്ച വിദഗ്ധസമിതി ഒന്നര വര്‍ഷം കഴിഞ്ഞിട്ടും റിപ്പോര്‍ട്ടു നല്‍കാത്തതിനെതിരെ വൈദ്യുതി ബോര്‍ഡ് ജീവനക്കാര്‍ കോടതിയെ സമീപിച്ചു. ജീവനക്കാരുടെ പെന്‍ഷന്‍ പ്രായം വര്‍ധിപ്പിക്കുന്നത് സംബന്ധിച്ച് പഠനം നടത്തിയ സമിതിയുടെ റിപ്പോര്‍ട്ട് എന്ന് നല്‍കുമെന്ന് വ്യക്തമാക്കാന്‍ ഹൈക്കോടതി സര്‍ക്കാരിന് നിര്‍ദ്ദേശം നല്‍കി. കേരള പവര്‍ ബോര്‍ഡ് ഓഫീസേഴ്‌സ് ഫെഡറേഷനും ഏതാനും ഉദ്യോഗസ്ഥരും നല്‍കിയ ഹര്‍ജി ഫയലില്‍ സ്വീകരിച്ചാണ് ജസ്റ്റിസ് ഡി കെ സിംഗിന്റെ ഉത്തരവ്. 2023 ഏപ്രിലിലാണ് കെഎസ്ഇബി അടക്കമുള്ള സംസ്ഥാന പൊതുമേഖലാ സ്ഥാപനങ്ങളിലെ സേവനവേതന വ്യവസ്ഥകള്‍ സംബന്ധിച്ച് പഠിക്കാന്‍ സര്‍ക്കാര്‍ സമിതിയെ നിയോഗിച്ചത്. എന്നാല്‍ നിശ്ചയിച്ച സമയ പരിധിക്കുള്ളില്‍ റിപ്പോര്‍ട്ട് ലഭ്യമാക്കുകയോ തുടര്‍ നടപടികള്‍ സ്വീകരിക്കുകയോ ചെയ്തില്ലെന്നാണ് ഹര്‍ജിക്കാരുടെ പരാതി. ഫെബ്രുവരി 11 ന് കേസ് വീണ്ടും പരിഗണിക്കുമ്പോള്‍ ഇതു സംബന്ധിച്ച് വിശദീകരിക്കണമെന്നാണ് കോടതി നിര്‍ദേശം.
പ്രതികരിക്കാൻ ഇവിടെ എഴുതുക