തിരുവനന്തപുരം: കന്നഡ സിനിമലോകത്ത് വലിയൊരു തരംഗമായിരുന്നു കെജിഎഫ്. വയലന്‍സിന്റെ അതുവരെ കാണാത്ത പുതിയൊരു ലോകമാണ് കെജിഎഫ് തുറന്നതെന്നതാണ് കന്നഡ പ്രേക്ഷകരെ ഞെട്ടിച്ചത്. ഇപ്പോഴിതാ കെജിഎഫിന് വെല്ലുവിളി ഉയര്‍ത്തി ഉണ്ണി മുകുന്ദന്റെ മാര്‍ക്കോ കന്നഡയില്‍ ഇറങ്ങുകയാണ്.
മലയാളത്തില്‍ മാത്രമാണ് മാര്‍ക്കോ ആദ്യം വിഭാവനം ചെയ്തിരുന്നതെങ്കിലും സിനിമ തരംഗമായതോടെ വിവിധ ഭാഷകളിലേക്ക് ഡബ്ബ് ചെയ്ത് വിതരണത്തിനെടുക്കാന്‍ കമ്പനികള്‍ മുന്നോട്ട് വരികയായിരുന്നു. ഇതോടെയാണ് ‘മാർക്കോ’ ഇതര ഭാഷകളിലും പുറത്തിറക്കാമെന്ന ചിന്തയുണ്ടായത്. ഹിന്ദിയിൽ ചിത്രത്തിന് ലഭിച്ച മികച്ച വരവേൽപ്പിന് പിന്നാലെ തെലുങ്കിലും ‘മാർക്കോ’ ഏറെ ശ്രദ്ധനേടിയിരുന്നു. ഇതിന്റെ ഭാഗമായി ജനുവരി 31 മുതൽ ‘മാർക്കോ’ കന്നഡ പതിപ്പ് പുറത്തിറങ്ങുകയാണ്.
തെലുങ്കിൽ ഒരു മലയാള സിനിമയ്‌ക്ക് ലഭിക്കുന്ന ഏറ്റവും വലിയ കളക്ഷൻ സ്വന്തമാക്കിയ മാർക്കോയ്‌ക്ക് 1.75 കോടി ഗ്രോസ് കളക്ഷനാണ് ഇവിടെ നിന്നും ആദ്യദിനം നേടാനായത്. ജനുവരി ഒന്നിന് 300 തിയേറ്ററുകളിലായാണ് തെലുങ്ക് പതിപ്പ് റിലീസ് ചെയ്തത്. കന്നഡയിലും ഇത്തരത്തിലൊരു വരവേൽപ്പ് തന്നെയാണ് ഏവരുടേയും പ്രതീക്ഷ. ക്യൂബ്സ് എന്‍റർടെയ്ൻമെന്‍റ്സിന്റെ ബാനറിൽ ഷെരീഫ് മുഹമ്മദ് നിർമ്മിച്ച് ഹനീഫ് അദേനി തിരക്കഥയെഴുതി സംവിധാനം ചെയ്ത 102.5 കോടി ആഗോള കളക്ഷൻ നേടിക്കഴിഞ്ഞ മാര്‍ക്കോ ചിത്രം കേരളത്തിൽ പ്രദർശനം തുടരുകയാണ്.
സിനിമയുടെ പ്രൊഡക്ഷൻ ക്വാളിറ്റിയിലുള്ള ആത്മവിശ്വാസത്തോടെ നിർമ്മിക്കുന്ന ആദ്യ സിനിമ തന്നെ വിതരണത്തിനെത്തിച്ചിരിക്കുകയുമാണ് ക്യൂബ്സ് എൻ്റർടെയ്ൻമെൻ്റ്സ്.ഏപ്രിലിൽ ചിത്രം കൊറിയൻ റിലീസിനായി ഒരുങ്ങുകയുമാണ്.
പ്രമുഖ ആക്ഷൻ ഡയറക്ടർ കലൈ കിങ്ങ്സ്റ്റൺ ചിത്രത്തിന് സംഘട്ടനം ഒരുക്കിയത്. ഇദ്ദേഹം ഉണ്ണി മുകുന്ദന്റെ ആക്ഷന് 100ല്‍ 100 മാര്‍ക്കാണ് നല്‍കുന്നത്. ജഗദീഷ്, സിദ്ദീഖ്, ആൻസൺ പോൾ, കബീർ ദുഹാൻസിംഗ് (ടർബോ ഫെയിം), അഭിമന്യു തിലകൻ, യുക്തി തരേജ തുടങ്ങിയവരാണ് പ്രധാന അഭിനേതാക്കള്‍. ഛായാഗ്രഹണം: ചന്ദ്രു സെൽവരാജ്, ചിത്രസംയോജനം: ഷമീർ മുഹമ്മദ്, സൗണ്ട് ഡിസൈൻ: സപ്ത റെക്കോർഡ്സ്, ഓഡിയോഗ്രഫി: രാജകൃഷ്ണൻ എം ആർ, കലാസംവിധാനം: സുനിൽ ദാസ്, മേക്കപ്പ്: സുധി സുരേന്ദ്രൻ, കോസ്റ്റ്യും&ഡിസൈൻ: ധന്യാ ബാലകൃഷ്ണൻ, പ്രൊഡക്ഷൻ ചീഫ് അസ്സോസ്സിയേറ്റ് ഡയറക്ടർ: സ്യമന്തക് പ്രദീപ്, എക്സിക്യുട്ടീവ് പ്രൊഡ്യൂസർ: അബ്ദുൾ ഗദാഫ്, ജുമാന ഷെരീഫ്, പ്രൊഡക്ഷൻ കൺട്രോളർ: ദീപക് പരമേശ്വരൻ, ഡിജിറ്റൽ മാർക്കറ്റിംഗ്: ഒബ്സ്ക്യൂറ എന്‍റർടെയ്ൻമെന്‍റ്, പിആർഒ: ആതിര ദിൽജിത്ത്.
പ്രതികരിക്കാൻ ഇവിടെ എഴുതുക