‘നിര്‍ണായക ധാതു ദേശീയ ദൗത്യ’ത്തിനു കേന്ദ്രമന്ത്രിസഭയുടെ അംഗീകാരം, ബജറ്റില്‍ ഉള്‍പ്പെടുത്തും

ന്യൂഡല്‍ഹി : പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ചേര്‍ന്ന കേന്ദ്ര മന്ത്രിസഭായോഗം ‘നിര്‍ണായക ധാതു ദേശീയ ദൗത്യ’ത്തിന് (NCMM) അംഗീകാരം നല്‍കി. 16,300 കോടി രൂപ ചെലവും പൊതുമേഖലാ സ്ഥാപനങ്ങളില്‍നിന്ന് 18,000 കോടി രൂപയുടെ നിക്ഷേപവും പ്രതീക്ഷിക്കുന്നതാണു ദൗത്യം. ആത്മനിര്‍ഭര്‍ ഭാരത് സംരംഭത്തിന്റെ ഭാഗമായി, ഹൈടെക് വ്യവസായങ്ങള്‍, സംശുദ്ധ ഊര്‍ജം, പ്രതിരോധം എന്നീ മേഖലകളില്‍ നിര്‍ണായക ധാതുക്കളുടെ ഒഴിച്ചുകൂടാനാകാത്ത പങ്കുതിരിച്ചറിഞ്ഞ്, നിര്‍ണായക ധാതു മേഖലയിലെ വെല്ലുവിളികള്‍ നേരിടാന്‍ ഇന്ത്യാ ഗവണ്മെന്റ് കഴിഞ്ഞ രണ്ടുവര്‍ഷമായി നിരവധി ഉദ്യമങ്ങള്‍ സ്വീകരിച്ചിട്ടുണ്ട്. നിര്‍ണായക ധാതുക്കളുടെ മേഖലയില്‍ ഇന്ത്യയുടെ സ്വയംപര്യാപ്തതയ്‌ക്കായി ഫലപ്രദമായ ചട്ടക്കൂടു സ്ഥാപിക്കേണ്ടതുണ്ട്. ഈ കാഴ്ചപ്പാടിന് അനുസൃതമായി,2024-25ലെ കേന്ദ്രബജറ്റില്‍ നിര്‍ണായക ധാതു ദൗത്യം കൊണ്ടുവരുമെന്നു ധനമന്ത്രി പ്രഖ്യാപിച്ചു.
ധാതുപര്യവേക്ഷണം, ഖനനം, പ്രയോജനപ്പെടുത്തല്‍, സംസ്‌കരണം, അങ്ങേയറ്റം ഉപയോഗപ്പെടുത്തിയ ഉല്‍പ്പന്നങ്ങളില്‍ നിന്നുള്ള വീണ്ടെടുപ്പ് എന്നിവയുള്‍പ്പെടെ മൂല്യശൃംഖലയുടെ എല്ലാ ഘട്ടങ്ങളും ഉള്‍ക്കൊള്ളുന്നതാണു കേന്ദ്രമന്ത്രിസഭ അംഗീകരിച്ച നിര്‍ണായക ധാതു ദേശീയ ദൗത്യം.
ഇന്ത്യയ്‌ക്ക് ആവശ്യമായ 30 ധാതുക്കളുടെ പട്ടിക നേരത്തെ സര്‍ക്കാര്‍ പുറത്തിറക്കിയിരുന്നു. ആന്റിമണി, ബെറിലിയം, ബിസ്മത്ത്, കോബാള്‍ട്ട്, കോപ്പര്‍, ഗാലിയം, ജെര്‍മേനിയം, ഗ്രാഫൈറ്റ്, ഹാഫ്‌നിയം, ഇന്‍ഡിയം, ലിഥിയം, മോളിബ്ഡിനം, നിയോബിയം, നിക്കല്‍, പിജിഇ, ഫോസ്ഫറസ്, പൊട്ടാഷ്, ആര്‍ ഇ. ഇ, റൈനിയം, സിലിക്കണ്‍, സ്‌ട്രോണ്‍ഷ്യം, ടെല്ലൂറിയം, ടാന്റല്‍ , ടൈറ്റാനിയം, ടങ്സ്റ്റണ്‍, വനേഡിയം, സിര്‍ക്കോണിയം, സെലിനിയം, കാഡ്മിയം എന്നിവയാണ് ഈ ധാതുക്കള്‍..