കോട്ടയം:കടപ്ലാമറ്റത്ത് കഴിഞ്ഞ രാത്രി വാഹനാപകടത്തില്‍ യുവാവ് മരിച്ചത് വിവാഹം നടക്കാന്‍ മണിക്കൂറുകള്‍ മാത്രം ബാക്കി നില്‍ക്കെ.വയല സ്വദേശി ജിജോ ജിന്‍സണ്‍(22) ആണ് മരിച്ചത്.
എം സി റോഡില്‍ കാളികാവ് പളളിയുടെ സമീപത്ത് വച്ചാണ് അപകടം ഉണ്ടായത്.വര്‍ഷങ്ങളുടെ പ്രണയം സഫലമാകാനിരിക്കെ സംഭവിച്ച ദുരന്തം നാട്ടുകാരെ കണ്ണീരിലാഴ്‌ത്തി.
വ്യാഴാഴ്ച രാവിലെ പത്ത് മണിക്ക് ഇലക്കാട് പള്ളിയില്‍ വെച്ചായിരുന്നു ജിജോയുടെ വിവാഹം നിശ്ചയിച്ചിരുന്നത്. വിവാഹ ആവശ്യത്തിനുള്ള സാധനങ്ങള്‍ വാങ്ങി കുറുവിലങ്ങാട് നിന്ന് വയലയിലെ വീട്ടിലേക്ക് പോകവെയാണ് അപകടമുണ്ടായത്.
ജിജോയും സുഹൃത്തും സഞ്ചരിച്ച ബൈക്ക് എതിരെ വന്ന ട്രാവലറില്‍ ഇടിച്ചു. ഇടിയുടെ ആഘാതത്തില്‍ റോഡിലേക്ക് തെറിച്ച് വീണ ജിജോ സംഭവ സ്ഥലത്ത് വെച്ച് തന്നെ മരിച്ചു. ഒപ്പമുണ്ടായിരുന്ന അജിത്തിനെ പരിക്കുകളോടെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. വയലത്തല സ്വദേശി ജിന്‍സന്റെയും നിഷയുടേയും മകനാണ് ജിജോ ജിന്‍സണ്‍.
പ്രതികരിക്കാൻ ഇവിടെ എഴുതുക