പാലക്കാട്: നെന്മാറ ഇരട്ടക്കൊലപാതക കേസിലെ പ്രതിയായ ചെന്താമരയെ റിമാന്‍ഡ് ചെയ്തു. പതിനാല് ദിവസത്തേക്കാണ് റിമാന്‍ഡ് ചെയ്തത്. അടുത്ത മാസം 12 വരെയാണ് ആലത്തൂര്‍ മജിസ്‌ട്രേറ്റ് കോടതി പ്രതിയെ റിമാന്‍ഡ് ചെയ്തത്.
തന്നെ നൂറു വര്‍ഷം ജയിലില്‍ അടച്ചോളൂ എന്നാണ് മജിസ്‌ട്രേറ്റിനോട് ചെന്താമര പറഞ്ഞത്.ഒറ്റയ്‌ക്കാണ് കൊലപാതകം നടത്തിയത്. മകളുടെയും മരുമകന്റെയും മുഖത്ത് നോക്കാനാകില്ലെന്ന ദുഖമേയുളളൂ എന്നും ചെന്താമര പറഞ്ഞു. മകള്‍ എഞ്ചിനീയറാണെന്നും മരുമകന്‍ ക്രൈംബ്രാഞ്ചിലാണെന്നുമാണ് ചെന്താമര പറഞ്ഞത്.
മനസ്താപമില്ലാത്ത കുറ്റവാളിയാണ് ചെന്താമരയെന്ന് പ്രതിയെ കോടതിയില്‍ ഹാജരാക്കുന്നതിന് മുന്നോടിയായി സമര്‍പ്പിച്ച പൊലീസിന്റെ റിമാന്‍ഡ് റിപ്പോര്‍ട്ടില്‍ പറയുന്നു.തന്റെ പദ്ധതി കൃത്യമായി നടപ്പാക്കിയതിന്റെ സന്തോഷമാണ് പ്രതിയ്‌ക്കെന്നും കൊല നടത്തിയത് കൃത്യമായ ആസൂത്രണത്തോടെയാണെന്നും റിമാന്‍ഡ് റിപ്പോര്‍ട്ടിലുണ്ട്.
ദിവസങ്ങള്‍ക്ക് മുമ്പ് തന്നെ കൊലപാതകം നടത്തുന്നതിന് കൊടുവാള്‍ വാങ്ങിയിരുന്നു. പൂര്‍വ വൈരാഗ്യമാണ് കൊല നടത്തിയതിന് കാരണം. ഇയാള്‍ പുറത്തിറങ്ങിയാല്‍ ഒരു പ്രദേശത്തിന് മുഴുവന്‍ ഭീഷണിയാണെന്നും റിമാന്‍ഡ് റിപ്പോര്‍ട്ടിലുണ്ട്. ചെന്താമരയ്‌ക്ക്വേണ്ടി അഡ്വ.ജേക്കബ് മാത്യു ആണ് വക്കാലത്ത് നല്‍കിയത്.
പ്രതികരിക്കാൻ ഇവിടെ എഴുതുക: