ഗംഗയിൽ സ്‌നാനം ചെയ്താൽ ദാരിദ്ര്യം മാറുമോയെന്ന് മല്ലികാർജുൻ ഖാർഗെ ; ഈ ചോദ്യം ഏതെങ്കിലും ഇഫ്താർ പാർട്ടിയിൽ പോയി ചോദിക്കാമോയെന്ന് സംബിത് പത്ര

ന്യൂഡൽഹി : പ്രയാഗ് രാജിൽ നടക്കുന്ന മഹാകുംഭമേളയെ പരിഹസിച്ച് കോൺഗ്രസ് പ്രസിഡന്റ് മല്ലികാർജുൻ ഖാർഗെ . ഗംഗയിൽ സ്‌നാനം ചെയ്യുന്നത് രാജ്യത്തെ ദാരിദ്ര്യം അവസാനിപ്പിക്കുമോ അതോ വിശക്കുന്നവരുടെ വയറു നിറയ്‌ക്കുമോ എന്നാണ് കോൺഗ്രസ് പ്രസിഡന്റിന്റെ ചോദ്യം . മധ്യപ്രദേശിലെ മോവിൽ നടന്ന ‘ജയ് ബാപ്പു, ജയ് ഭീം, ജയ് സംവിധാൻ’ റാലിയിലാണ് സനാതനധർമ്മത്തിന്റെ ഭാഗമായ ഏറ്റവും വലിയ മതസമ്മേളത്തെ ഖാർഗെ പരിഹസിച്ചത്.

ഖാർഗെയ്‌ക്കെതിരെ വൻ വിമർശനമാണ് ഉയരുന്നത് . കോൺഗ്രസിന്റെ വിദ്വേഷം കോടിക്കണക്കിന് ഹിന്ദുക്കളുടെ വിശ്വാസത്തിന് നേരെയുള്ള ആക്രമണമാണെന്ന് ബിജെപി നേതാവ് സംബിത് പത്ര പറഞ്ഞു.

“കാലങ്ങളായി സനാതന വിശ്വാസത്തിന്റെ പ്രതീകമാണ് മഹാകുംഭം. ലോകം മുഴുവൻ ഈ വിശ്വാസത്തെ ബഹുമാനിക്കുമ്പോൾ, ഇന്ത്യയിലെ ഏറ്റവും വലിയ പ്രതിപക്ഷ പാർട്ടി മഹാകുംഭത്തെയും ഈ വിശ്വാസത്തെയും പരിഹസിക്കുന്നുവെന്ന് പറയുന്നതിൽ എനിക്ക് വേദനയുണ്ട്. അവർ അതിനെ പരിഹസിക്കുകയാണ് . മറ്റേതെങ്കിലും മതത്തിന്റെ വിശ്വാസത്തെക്കുറിച്ച് ഇത്തരം പരാമർശങ്ങൾ നടത്താൻ ഞാൻ മല്ലികാർജുൻ ഖാർഗെയെയും സോണിയ ഗാന്ധിയെയും രാഹുൽ ഗാന്ധിയെയും വെല്ലുവിളിക്കുന്നു. ഇഫ്താർ പാർട്ടിയിൽ പോയി ആളുകൾക്ക് ജോലി ലഭിക്കുമോ, ദാരിദ്ര്യം ലഘൂകരിക്കപ്പെടുമോ എന്ന് അവർക്ക് ചോദ്യം ചെയ്യാൻ കഴിയുമോ? മറ്റൊരു മതത്തിന്റെ വിശ്വാസവുമായി കളിക്കുന്നത് അവർക്ക് സങ്കൽപ്പിക്കാൻ പോലും കഴിയില്ല “ – സംബിത് പത്ര പറഞ്ഞു.

അതേസമയം ലോകത്തിലെ ഏറ്റവും വലിയ തീർഥാടകസംഗമമാണ് കുംഭമേള . ഇവിടെ പ്രതീക്ഷിക്കുന്നത് മൊത്തം 40 കോടി പേരെയും . അതായത്, യു.എസിലെയും റഷ്യയിലെയും ജനസംഖ്യയേക്കാള്‍ കൂടുതൽ ജനങ്ങൾ. ഇതിന്റെ ചിലവ് ഏകദേശം 7000 കോടിരൂപയാണെങ്കിൽ മഹാകുഭമേള ഉത്തര്‍പ്രദേശ് സര്‍ക്കാരിന് നേടിക്കൊടുക്കാന്‍ പോകുന്ന വരുമാനം ഏകദേശം രണ്ടുലക്ഷം കോടി രൂപ ആയിരിക്കുമെന്നാണ് വിലയിരുത്തല്‍.

മഹാകുംഭമേളയില്‍ പങ്കെടുക്കാന്‍ എത്തുമെന്ന് വിലയിരുത്തപ്പെടുത്ത 40 കോടി ജനങ്ങളില്‍ ഓരോരുത്തരും 5,000 രൂപവെച്ച് ചെലവാക്കിയാല്‍ തന്നെ മേളയില്‍നിന്ന് ലഭിക്കുന്ന ആകെ വരുമാനം രണ്ടുലക്ഷം കോടി രൂപയായിരിക്കും.കോണ്‍ഫെഡറേഷന്‍ ഓഫ് ഓള്‍ ഇന്ത്യ ട്രേഡേഴ്‌സിന്റെ കണക്ക് പ്രകാരം പാക്കേജ് ഭക്ഷണം, വെള്ളം, ബിസ്‌ക്കറ്റ്, ജ്യൂസുകള്‍, മീല്‍സ് എന്നിവ അടങ്ങുന്ന ഭക്ഷണവും വെള്ളവും എന്ന വിഭാഗത്തില്‍ നിന്നുതന്നെ ഏകദേശം 20,000 കോടി വരുമാനം ലഭിക്കും.

ഇത് ദേശീയ മാദ്ധ്യമങ്ങൾ അടക്കം വാർത്തയായി നൽകിയിരുന്നതുമാണ് . എന്നിട്ട് പോലും മഹാകുംഭമേള ദാരിദ്ര്യം മാറ്റുമോയെന്ന ചോദിച്ച ഖാർഗെയ്‌ക്കെതിരെ പരിഹാസവുമുയരുന്നുണ്ട്.