ചെന്നൈ: തമിഴ്നാട് നിയമസഭയിൽ ദേശീയ ഗാനം ആലപിക്കാത്തതിൽ പ്രതിഷേധിച്ച് നയപ്രഖ്യാപന പ്രസംഗം നടത്താതെ ഗവർണർ ആർ.എൻ രവി ഇറങ്ങിപ്പോയി. സംസ്ഥാന ഗാനമായ ‘തമിഴ് തായ് വാഴ്’ത്തിന് ശേഷം ദേശീയ ഗാനം ആലപിച്ചിരുന്നില്ല. ഇത് ചൂണ്ടിക്കാട്ടിയ ഗവർണർ ദേശീയഗാനം ആലപിക്കണമെന്ന് ആവശ്യപ്പെട്ടു. എന്നാൽ സർക്കാർ ആവശ്യം തള്ളുകയായിരുന്നു. ഇതേത്തുടർന്ന് ഗവർണർ നിയമസഭയിൽ നിന്നും ഇറങ്ങിപ്പോവുകയായിരുന്നു.
ഭാരതത്തിന്റെ ഭരണഘടനയെയും ദേശീയ ഗാനത്തെയും ഇന്ന് തമിഴ്നാട് നിയമസഭയിൽ വീണ്ടും അപമാനിച്ചുവെന്ന് രാജ്ഭവൻ എക്സിൽ കുറിച്ചു. നമ്മുടെ ഭരണഘടന അനുശാസിക്കുന്ന പ്രഥമ മൗലിക കർത്തവ്യങ്ങളിൽ ഒന്നാണ് ദേശീയഗാനത്തെ ബഹുമാനിക്കുക എന്നത്. എല്ലാ സംസ്ഥാന നിയമസഭകളിലും ഗവർണറുടെ പ്രസംഗത്തിന്റെ തുടക്കത്തിലും അവസാനത്തിലും ദേശീയഗാനം ആലപിക്കാറുണ്ട്. എന്നാലിന്ന് ഗവർണർ സഭയിൽ എത്തുമ്പോൾ തമിഴ് തായ് വാഴ്ത്ത് മാത്രമാണ് ആലപിച്ചത്. തുടർന്ന് ഗവർണർ സഭയുടെ ഭരണഘടനാപരമായ കടമയെക്കുറിച്ച് ഓർമ്മിപ്പിച്ചെങ്കിലും ദേശീയ ഗാനം ആലപിക്കാൻ സഭാ നേതാവും സ്പീക്കറും തയാറായില്ലെന്ന് രാജ്ഭവൻ എക്സിലൂടെ പുറത്തിറക്കിയ പ്രസ്താവനയിൽ പറഞ്ഞു.
ഭരണഘടനയെയും ദേശീയഗാനത്തെയും ഇത്രയും ക്രൂരമായി അനാദരിക്കുന്നതിൽ കക്ഷിയാകാതിരിക്കാൻ ഗവർണർ അഗാധമായ വേദനയോടെ സഭ വിടുകയായിരുന്നുവെന്നും എക്സിൽ വ്യക്തമാക്കി.
ഗവർണർ സഭ വിട്ടതോടെ അണ്ണാ സർവകലാശാലയിൽ ലൈംഗികാതിക്രമത്തിനിരയായ വിദ്യാർഥിനിക്ക് നീതി ലഭിക്കണമെന്ന് ആവശ്യപ്പെട്ട് പ്രതിപക്ഷമായ എഐഎഡിഎംകെ അംഗങ്ങൾ പ്ലക്കാർഡുകൾ ഉയർത്തി മുദ്രാവാക്യം വിളിച്ചു. ഗവർണറുടെ നടപടിയെ അപലപിച്ച് കോൺഗ്രസ് അംഗങ്ങൾ ഇറങ്ങിപ്പോയി.
