കടയിൽ നിന്നും വില കൂടിയ ലാപ്ടോപ് മോഷ്ടിച്ചയാൾ പിടിയിൽ

കൊച്ചി : സംശയാസ്പദമായ സാഹചര്യത്തിൽ കാണപ്പെട്ട ഇതര സംസ്ഥാനത്തൊഴിലാളിയെ ചോദ്യം ചെയ്തപ്പോൾ തെളിഞ്ഞത് ലാപ്ടോപ്പ് മോഷണം. അസം മൊറിഗാൻ സ്വദേശി ഉബൈദുള്ള (24)യെയാണ് പെരുമ്പാവൂർ പോലീസ് ലാപ്ടോപ്പ് മോഷണത്തിന് അറസ്റ്റ് ചെയ്തത്.

പെരുമ്പാവൂർ ടൗണിൽ പട്രോളിംഗ് നടത്തുകയായിരുന്ന ഇൻസ്പെക്ടർ ടി. എം സൂഫിയുടെ നേതൃത്വത്തിലുള്ള പോലീസ് കാളച്ചന്ത ഭാഗത്ത് സംശയാസ്പദമായ നിലയിൽ കാണപ്പെട്ട അസം സ്വദേശിയെ കസ്റ്റഡിയിലെടുക്കുകയായിരുന്നു. തുടർന്ന് നടന്ന അന്വേഷണത്തിലാണ് ലാപ് ടോപ്പ് മോഷണം തെളിഞ്ഞത്.

കഴിഞ്ഞ 14 ന് രാത്രി എച്ച്എംടി സിഗ്നൽ ഭാഗത്തെ കടയിൽ നിന്നുമാണ് നാൽപ്പതിനായിരം രൂപ വിലവരുന്ന ആപ്പിൾ കമ്പനിയുടെ ലാപ്ടോപ്പ് ഇയാൾ മോഷ്ടിച്ചത്. വിൽപ്പന നടത്താനുള്ള ശ്രമത്തിലായിരുന്നു മോഷ്ടാവ്.

എസ്.ഐ മാരായ പി.എം റാസിക്ക്, റിൻസ് എം തോമസ് എന്നിവരും അന്വേഷണ സംഘത്തിലുണ്ടായിരുന്നു.