കോഴിക്കോട് : വടകരയില്‍ കാറിടിച്ച് ഒമ്പത് വയസുകാരി മാസങ്ങളായി അബോധാവസ്ഥയില്‍ കഴിയുന്ന സംഭവത്തില്‍ പ്രതിയുടെ ഭാര്യയെയും കേസില്‍ പ്രതി ചേര്‍ത്തേക്കും. കാറോടിച്ച പുറമേരി സ്വദേശി ഷെജീലിനെ വിദേശത്ത് നിന്ന് രണ്ടാഴ്ചയ്‌ക്കകം നാട്ടിലെത്തിക്കാനാണ് പൊലീസ് ശ്രമം. അപകടമുണ്ടാക്കിയ കാര്‍ കഴിഞ്ഞ ദിവസം പൊലീസ് കസ്റ്റഡിയില്‍ എടുത്തു.
കഴിഞ്ഞ ഫെബ്രുവരി 17ന് വടകര ചോറോട് ദേശീയപാതയില്‍ രാത്രി 9 മണിയോടെയാണ് ദൃഷാനയെന്ന ഒമ്പത് വയസുകാരിയെയും 62 കാരിയായ മുത്തശ്ശി ബേബിയെയും കാറിടിച്ചത്. ബേബി മരണപ്പെടുകയും കൊച്ചുമകള്‍ ദൃഷാന അബോധാവസ്ഥയില്‍ ആവുകയും ചെയ്തു.
ഇരുവരെയും ഇടിച്ച കാര്‍ നിര്‍ത്താതെ പോയി. ഇടിച്ചത് വെള്ള കാര്‍ എന്ന സൂചന അല്ലാതെ മറ്റൊരു തെളിവും ആദ്യം കിട്ടിയിരുന്നില്ല. നീണ്ട അന്വേഷണങ്ങള്‍ക്കൊടുവിലാണ് ഷെജീലിന്റെ ഉടമസ്ഥതയിലുള്ള കാറാണ് അപകടമുണ്ടാക്കിയതെന്നും ഷെജീല്‍ തന്നെയാണ് കാര്‍ ഓടിച്ചതെന്നും പൊലീസ് കണ്ടെത്തിയത്.
ഭാര്യയും രണ്ട് കുട്ടികളുമൊത്ത് സഞ്ചരിക്കവെയാണ് ഷെജീല്‍ ഓടിച്ച സ്വിഫ്റ്റ് കാര്‍ കുട്ടിയെയും മുത്തശ്ശിയെയും ഇടിച്ചത്. അപകടം പുറത്ത് അറിയാതിരിക്കാന്‍ ഷെജീല്‍ വാഹനത്തിന്റെ ബംബര്‍ ഉള്‍പ്പെടെയുള്ളവ മാറ്റിയിരുന്നു. കൃത്യസമയത്ത് ആശുപത്രിയില്‍ എത്തിച്ചിരുന്നെങ്കില്‍ ബേബിയുടെ ജീവന്‍ രക്ഷിക്കാമായിരുന്നു.മാസങ്ങളായി കോമ അവസ്ഥയില്‍ കോഴിക്കോട് മെഡിക്കല്‍ കോളജ് ആശുപത്രിയില്‍ കഴിയുന്ന ദൃഷാനയുടെ ഗതിയും ഇതാകുമായിരുന്നില്ല.
അതേസമയം, ദൃഷാനയുടെ ചികിത്സയ്‌ക്ക് ബുദ്ധിമുട്ടുകയാണ് കുടുംബം.
പ്രതികരിക്കാൻ ഇവിടെ എഴുതുക: