ശ്രീഹരിക്കോട്ട: സൂര്യന്റെ കൊറോണയെക്കുറിച്ചുള്ള പഠനം ലക്ഷ്യമിട്ടുള്ള യൂറോപ്യൻ ബഹിരാകാശ ഏജൻസിയുടെ പ്രോബ-3 സോളാർ ദൗത്യത്തിന്റെ വിക്ഷേപണം വിജയകരമായി പൂർത്തിയാക്കി ഐഎസ്ആർഒ. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്നുമാണ് രണ്ട് ഉപഗ്രഹങ്ങളുമായി പിഎസ്എൽവി സി59 റോക്കറ്റില് വിക്ഷേപിച്ചത്. വൈകുന്നേരം 4.04ന് ആയിരുന്നു വിക്ഷേപണം.
പ്രോബ-3യിൽ സാങ്കേതിക തകരാർ കണ്ടെത്തിയതിനെ തുടർന്ന് ഇന്നല വിക്ഷേപിക്കാനിരുന്ന ദൗത്യം ഇന്നത്തേക്ക് മാറ്റുകയായിരുന്നു. യൂറോപ്യൻ സ്പേസ് ഏജൻസിയുടെയും ഐഎസ്ആർഒ കൊമേഴ്ഷ്യൽ വിഭാഗം ന്യൂസ്പേസ് ഇന്ത്യ ലിമിറ്റഡിന്റെയും നേതൃത്വത്തിലാണ് ദൗത്യം. ഓക്യുൽറ്റർ, കൊറോണഗ്രാഫ് എന്നീ ഉപഗ്രഹങ്ങളെയാണ് പ്രോബ-3 ദൗത്യത്തിൽ പഠനത്തിനായി അയച്ചത്. കൃത്രിമമായി സൂര്യഗ്രഹണം സൃഷ്ടിച്ച് സൂര്യന്റെ പ്രഭാവലയത്തെക്കുറിച്ച് പഠിക്കുന്ന വിധത്തിലാണ് ദൗത്യം രൂപകല്പന ചെയ്തിരിക്കുന്നത്. ഇതിനായാണ് രണ്ട് ഉപഗ്രഹങ്ങളെ അയച്ചത്.
സൗരയൂഥത്തിലെ കൊറോണയെക്കുറിച്ച് പഠിക്കാൻ ഉചിതം സൂര്യഗ്രഹണ സമയമായതിനാൽ രണ്ട് പേടകങ്ങൾ കൃത്രിമ സൂര്യഗ്രഹണം സൃഷ്ടിക്കും. ഇതിനായി ഒരു പേടകത്തിന് മുന്നിൽ അടുത്ത പേടകം സ്ഥാപിക്കും. ഒരു ഉപഗ്രഹം മറ്റൊരു ഉപഗ്രഹത്തിൽ നിഴൽ വീഴ്ത്തുമ്പോൾ സൂര്യഗ്രഹണം ദൃശ്യമാകും. തുടർന്ന് നടത്തുന്ന പഠനം സൂര്യനെക്കുറിച്ചുള്ള കൂടുതൽ വിവരങ്ങൾ ലഭിക്കുന്നതിൽ നിർണായകമായിരിക്കും.
ഭൂമിയിലെ ഉപഗ്രഹ ആശയവിനിമയം വരെ തടസ്സപ്പെടുത്തുന്ന സൗര കൊടുങ്കാറ്റുകൾ ഉത്ഭവിക്കുന്നത് കൊറോണയിൽ നിന്നാണ്. പ്രോബ-3 ദൗത്യം കൊറോണയെക്കുറിച്ചുള്ള കൂടുതൽ കാര്യങ്ങൾ പഠിക്കുന്നതിന് സഹായകമാവും. ഇന്നലെ (ഡിസംബർ 4) ആയിരുന്നു പ്രോബ-3 വിക്ഷേപിക്കാനിരുന്നത്. എന്നാൽ പേടകത്തിലെ സാങ്കേതിക തകരാറുകൾ ചൂണ്ടിക്കാട്ടി ദൗത്യം ഇന്നേക്ക് മാറ്റിവെക്കുകയായിരുന്നു.
